Амма улууһун дьокутааттарын Сэбиэтин бэрэссэдээтэлэ Владимир Колосов Ил Дархан Туһаайан этиитин тус сылдьан иһиттэ уонна бэйэтин санаатын бу курдук үллэстэр.
“Биһиги улуус баһылыга Степан Николаевич Кузьмины кытта өрөспүүбүлүкэ Бырабыыталыстыбатын 1№-дээх дьиэтигэр Ил Дархан Айсен Сергеевич Николаев Ил Түмэн Судаарыстыбаннай Мунньаҕар Туһаайан этиитин болҕойон иһиттибит. Ол түмүгүнэн эттэхпинэ быйылгы этии өрөспүүбүлүкэбит сайдыытын бары хайысхаларын толору таарыйда. Ол курдук олус оруннаах уонна Арассыыйа Бэрэсидьиэнэ ыытар бэлиитикэтин барытын тоһоҕолоон бэлиэтээтэ. Ол курдук Анал этии түмүгү таһаарыы эрэ курдук буолбакка, иннибитигэр турар стратегическай соруктары туруорар. Биир бэйэм кэлэр сыл былааннарыгар инфраструктура сайдыытыгар, тыа хаһаайыстыбатын боломуочуйаларын улууска биэрии, оҕо төрөөһүнүгэр өрөспүүбүлүкэ биэрэр ийэ хапытаалын үһүс эрэ оҕоҕо буолбакка, төрдүс, бэһис, алтыс оҕоҕо эмиэ биэрэргэ , инфраструктура сайдыытыгар бырайыактыыр институт тэриллиэ, “Амма” өрөспүүбүлүкэ таһымнаах суолу салгыы асфаллааһын барыа, ол хонтуруолга туруо диэн этиитин сэргии да, үөрэ да иһиттим. Маны сэргэ кэлэр сыл Сахабыт сиригэр Ийэ дойдуну көмүскээччилэр сылларынан биллэриллибитэ олус дириҥ суолталаах дии саныыбын. Биһиги ыытар үлэбит барыта эйэлээх, туруктаах олох кэлэрин туһугар оҥоһуллуохтаах. Оскуолаларга патриотическай үлэ күүскэ барыаҕа. Маныаха оҕоҕо кыра сааһыттан Ийэ дойдуга тапталы иҥэрэн, патриоттуу өйгө-санааҕа иитэргэ биллэриллибит сылбыт улахан төһүү күүс буолуо. Маны сэргэ байыаннай дьайыыга кытта сылдьар байыастарбытыгар, кинилэр дьиэ кэргэттэригэр улахан өйөбүллээх буолуоҕа”.
“Амма олоҕо” хаһыат