Амматааҕы «Фаворит» кулуупка илин эҥэр улуустарыттан 49 бильярд спордун сэҥээрээччилэр кэлэн бастыҥы быһаарыстылар. Күрэхтэһии кулуубу төрүттээччи, Амма нэһилиэгин бочуоттаах олохтооҕо, урбаанньыт, энтузиаст Григорий Аммосов 60 сааһыгар ананан ыытылынна.
Күрэхтэһээччилэр 50-тан 65 саастарыгар диэри уонна 65-тан үөһээ саастаахтарга диэн арахсан оонньоотулар. Ол курдук Мэҥэ Хаҥаластан, Тааттаттан, Уус Алдантан, Чурапчыттан кэлэннэр бэркэ астына кииристилэр. Күрэхтэһиигэ 60-тан үөһээ бөлөххө доруобуйаларынан хааччахтаах дьон уонна алта кэрэ аҥар киирдилэр. Онон 50-тан 65-саастарыгар диэри бөлөххө 27 уонна 65-тэн үөһээ бөлөххө 22 киһи кииристэ.
Турнир бэрт тыҥааһыннаахтык барда. Бильярдистар өрө тэбинэн туран икки күн устата оонньоотулар. Өрөбүлгэ арыый эрдэ бүтэр сыалтан бастакы күн олох да сарсыарда 4 чааска диэри кииристилэр. Онон бу спорд көрүҥүн сөбүлээччилэр кытаанах тулуурдарын көрдөрдүлэр.
Дьэ финалга күүстээхтэр хаалан бириистээх миэстэлэри былдьастылар. Маныаха 65-тэн үөһээ саастаахтарга бастакы миэстэни Таатта Чымнаайытыттан Марфа Васильева ылла. Иккис миэстэҕэ Мэҥэ Хаҥалас Павловскайыттан Николай Бочкарев, үһүс миэстэҕэ Чурапчы Сылаҥыттан Прохор Макаров уонна Амма Сатаҕайыттан Афанасий Неустроев таҕыстылар. Онтон 50-65-гэр диэри саастаахтарга бастакы миэстэни Мэҥэ Хаҥалас Төхтүрүттэн Валерий Иванов, иккис миэстэни эмиэ Төхтүртэн Иван Васильев, үһүс миэстэни Суолаттан Григорий Свинобоев уонна Тааттаттан Валентин Лягушин ыллылар.
«Амма олоҕо» хаһыат