Дьокуускай куоракка нуучча дуобатыгар өрөспүүбүлүкэ чемпионата буолан ааста. Бу күрэхтэһиигэ Амма улууһун инбэлииттэрэ ситиһиилээхтик кытыннылар, улуустарын ааттаттылар.
“Чемпионатка харахтарынан мөлтөх, истибэт уонна илиилэригэр-атахтарыгар кэһиилээх дьон үс хайысханан арахсан күрэхтэстилэр. Манна уопсайа 12 улуус уонна Дьокуускай куорат хамаандалара күөн көрүстүлэр. 63 кыттааччы баар. Ол иһигэр биир норуоттар икки ардыларынааҕы маастар, биир гроссмейстер, 2 Арассыыйа маастара, 4 маастарга кандидат бааллар. Биһиги улуустан 10 буолан бары хайысханан туох баар кыахпытынан кытынныбыт. Ол курдук Матрена Федорова илиилэрэ-атахтара кэһиилээх инбэлииттэр бөлөхтөрүгэр 3-с миэстэ буолары ситистэ. Вера Тимофеева 6-с, Маргарита Лазарева 8-с миэстэ буоллулар. Онтон эр дьоҥҥо бэйэм 4-с, Иван Бураев 5-с уонна Иван Васильев 6-с миэстэлэри ыллыбыт. Көрбөттөр бөлөхтөрүгэр 15 киһиттэн Семен Григорьев 7-с, Александра Николаева 6-с миэстэлэргэ таҕыстылар. Истибэттэр ортолоругар Гаврил Прокопьев 6-с, Лидия Егорова 4-с миэстэ буоллулар”, — диэн Амма улууһун инбэлииттэрин уопсастыбатын адаптивнай спорт көрүҥнэригэр исписэлииһэ Семен Килбясов сырдатта.
“Амма олоҕо” хаһыат