Бүгүн Саха өрөспүүбүлүкэтигэр Сылгыһыт күнэ. Бу күн 2016 сылтан ыла бэлиэтэнэн кэллэ. Амма улууһун тыатын хаһаайыстыбатын салайааччыта, СӨ тыатын хаһаайыстыбатын туйгуна Ион Кононов бүгүн Саха өрөспүүбүлүкэтигэр бэлиэтэнэр Сылгыһыттар күннэринэн истиҥ эҕэрдэтин тириэрдэр.
“Биһиги улууспут Үлэ Геройа Тимофей Спиридонович Лукин, икки “Кыһыл Знамя” уордьан кавалера, өрөспүүбүлүкэ норуотун хаһаайыстыбатын үтүөлээх үлэһитэ, судаарыстыбаннай бириэмийэ лауреата, ыччат наставнига Гаврил Михайлович Семенов, Саха өрөспүүбүлүкэтин тыатын хаһаайыстыбатын үтүөлээх үлэһитэ Иван Николаевич Новиков, «Бочуот знага» уордьан кавалера Николай Дмитриевич Гурьев, чемпион сылгыһыт Петр Васильевич Константинов уонна да атын холобурга сылдьар, уос номоҕор киирбит туруу үлэһит сылгыһыттардааҕынан киэн туттабыт. Күн бүгүн улуус үрдүнэн 60-тан тахса сылгы базата баар. 133 бааһынай хаһаайыстыба баарыттан 50-тан тахсата сылгынан дьарыктаналлар. Маны сэргэ түөрт сылгыны иитэр племенной хаһаайыстыбалардаахпыт. Өрөспүүбүлүкэ тыатын хаһаайыстыбатын туйгуна Василий Васильевич Тимофеев бэрэссэдээтэллээх Строд аатынан хаһаайыстыба өрөспүүбүлүкэҕэ бастакынан сылгы собуотун статуһун ылбыта. Саха дьоно былыр былыргыттан сылгыны иитэн, Дьөһөгөй таҥараланан кэлбит норуот буолабыт. Сылгы биһиги олохпутун кытта ыкса сибээстээх. Сыспай сиэллээхпитин, чөрөгөр кулгаахтаахпытын көрөр-истэр, тулуурдаах, дьулуурдаах сылгыһыт дьоммутун идэлээх күннэринэн истиҥник эҕэрдэлиибин! Сотору муус устар 6 күнүгэр ыраах Үөһээ Дьааҥы улууһугар ыытыллар Сылгыһыттар күрэхтэригэр улуус чиэһин көмүскүүр Анатолий Баишев салайааччылаах “Давидофф” тэрилтэ хамаандатыгар ситиһиини, кыайыыны баҕарабын”, — диэн Ион Семенович баҕа санаатын, эҕэрдэтин тириэртэ.
“Амма олоҕо” хаһыат
