Бүгүн Ил Дархан Айсен Николаев Ил Түмэн Судаарыстыбаннай мунньахха ыҥырыытыгар кэлэр сылтан улуус дьаһалталара бэйэлэрин уратыларын көрөн бэйэлэрэ тыа хаһаайыстыбатын сайдыытын бэлиитикэтин быһаарар буолуохтара диэн эттэ.
“Ил Дархан бэйэтин туһаайан этиитигэр кэлэр сылтан тыа хаһаайыстыбатын боломуочуйалара толору улууска бэриллэллэрин, биһиги бэйэбит хайа салаабытын сайыннарыыга көрөн үбүлээһини оҥорорбутун өссө төгүл бигэргэттэ. Бу кэпсэтии барбыта ыраатта. Онон дьэ олоххо киирэр буолла. Ил Дархан тыа хаһаайыстыбатыгар бэриллэр субвенция 900 мөлүйүөнтэн 8,9 млрд солкуобайга тиийэ улаатыа диэн истэн астынным. Биһиги бэриллибит үбү көрөн көдьүүстээхтик туһанылларын быһаарыахпыт.
Чахчы да ханнык баҕарар улуус миэстэтигэр хайдах туох салааны көрөн сайыннарара саамай сөптөөх дии саныыбын. Бу барыта олохтоох бэйэ бородууксуйата үрдүүгэр тирэх буолуо”, — диэн тыа хаһаайыстыбатын управлениетын салайааччыта Ион Кононов үллэстэр.
“Амма олоҕо” хаһыат