Үлэ Дьоруойа П.И. Яковлев аатынан Амма Наахара орто оскуолатыгар Ийэ нэдиэлэтэ ыытылынна. Аан дойду, Арассыыйа, Өрөспүүбүлүкэ сыллата бэлиэ күннэри тэрийэн Ийэ диэн күндү киһибитигэр бэлэх уунара олус хайҕаллаах.
Биһиги үөрэнээччилэрбит «Ийэбэр бэлэх» диэн ааттаах илиинэн оҥоһук аахсыйатыгар 100% кытыннылар. Нэдиэлэ иһинэн волейбол күрэҕэ буолан ааста. Волейбол күрэҕэр 15 кыыс, 15 ийэ кытынна. Икки оҕолор, икки ийэлэр хамаандалара күөн көрүстэ. 1 миэстэни Людмила Александрова хапытааннаах ийэлэр хамаандалара, 2 миэстэҕэ Нарыйаана Макарова салайбыт кыргыттар хамаандалара, 3 миэстэҕэ Мария Пахомова капитаннаах ийэлэр хамаандалара, 4 миэстэҕэ Саша Сигаева салайбыт орто бөлөх кыргыттарын хамаандата тахсан мээчиктиин тэйдилэр, күүстэрин көрдөрдүлэр.
Маны тэҥэ «Ийэбинээн ааҕарбын сөбүлүүбүн» хаартыска күрэҕэ ыытылынна. Күрэҕи оскуола иһинэн үлэлиир «Аартык» медиа киин тэрийэн ыытта. Барыта 24 ыал күрэххэ кытынна. Бэртээхэй хаартыска быыстапката оскуола рекрациятыгар туран үөрэнээччилэр Ийэ нэдиэлэтигэр үөрэ-көтө көрдүлэр-иһиттилэр. Манна бастыҥнарынан Илларионова Фекла Елисеевна, Александрова Людмила Трофимовна, Унарова Екатерина Николаевна, Ефремова Дария Георгиевна, Никифорова Сахая Валерьевна, Захарова Нюргуяна Николаевна, Степанова Алена Вячеславовна,Устинова Наталья Дмитриевна хаартыскалара ааттаннылар.
Ийэ сылаас сыһыана, истиҥ мичээрэ, холку куолаһа, кэрэ дьүһүнэ хас биирдии оҕоҕо, киһиэхэ олоҕун тухары кэрэни, сырдыгы, сылааһы түстүүр. Кини нарын куолаһынан кэпсиир остуоруйалара, ааҕар кэпсээннэрэ хас барыбытыгар умнуллубат өйдөбүл буолан олохпут тухары барыбытын харыстыы, араҥаччылыы сырыттын!
Ирина Корякина – Олесова.