И.И. Константинов-Дэлэгээт Уйбаан аатынан Сулҕаччы орто оскуолатын хас биирдии кылааһа бэйэтэ сылын аайы көмө оҥорор кырдьаҕастардаахтар. Аҕам саастаахтар декадаларын чэрчитинэн оҕолор шефтэһэр аҕам саастаахтарыгар сылдьан эҕэрдэлээн, кэһиилэрин, бэлэхтэрин ууннулар.
Ол курдук, Венера Васильевна Данилова кылаас салайааччытынан үлэлиир 10-с кылаас коллектива үлэ, тыыл ветерана Елена Григорьевна уонна кини кыыһа үлэ ветерана Саргылана Николаевна Рязанскаяны кытта шефтэһэллэр. Аҕам саастаахтар күннэригэр эрэ буолбакка, ветераннар хаһан баҕарар көмөҕө наадыйдылар да, баран көрдөһүү сорудаҕы улгумнук толороллор.
Быйылгы көмө күннэрин оҕолор «Күһүҥҥү киһи күлбүтүнэн» диэн ааттааннар,сайыҥҥы, күһүҥҥү хомууртан оҕуруот аһыттан, байанай бэлэҕиттэн, үрүҥ ас арааһыгар, уонна минньигэс барыанньа арааһын кэһиилэнэн тиийэн, ис сүрэхтэриттэн бэлэх оҥорон ветераннары үөртүлэр. Ветераннар оҕолорго бэйэлэрэ эмиэ утары бэлэх ууннулар. Ол курдук, Елена Григорьевна оҕолорго алгыс тылын анаата, билии-үөрэх наадалааҕын тоһоҕолоон бэлиэтээтэ уонна иллэҥ кэмигэр хомуска оонньоон иһитиннэрдэ. Онтон Саргылана Николаевна оҕолорго историяны төһө билэллэрин тургутар интеллектуальнай оонньуу ыытта. Бу кылаас коллектива Рязанскайдары кытта 1 кылаастан саҕалаан шефтэһэллэр. Сыл устата сыһыарыллыбыт дьонноругар араас тимуровскай көмөнү сэргэ, кылаас чааһа, ветеранныын көрсүһүү курдук араас тэрээһиннэри ыыталлар. 10 кылаастар ити курдук ветераннарын үөрдэн-минньигэс аһынан бэлэхтээн бардылар.
Онтон Татьяна Анатольевна Горбач салайар 9 кылаас коллектива үлэ ветерана Мирон Никитич Неустроевы кытта эмиэ хаһыс да сылларын шефтэһэллэр. Сыл устата эмиэ араас көмөнү оҥороллор, тэрээһиннэри ыыталлар.
Елена Попова.