Амма нэһилиэгин “Сардаана” оҕо сайдар киин көмүс үбүлүөйүн үрдүк тэрээһиннээхтик ыытан оҕолорун, төрөппүттэрин, иитээччилэрин, бэтэрээннэрин, араас кэмҥэ үлэлии сылдьыбыт үлэһиттэрин, ыҥырыылаах ыалдьыттарын үөртэ, сөхтөрдө.
Үбүлүөйдээх тэрээһин олус үчүгэйдик, табыгастаахтык барыта толкуйданан, ис сүрэхтэн кыһаллан оҥоһуллубута көстөр. Кулууп дьиэҕэ киирээти кытта сахалыы таҥастаах уолаттар көрсөн кэлбит киһиэхэ барытыгар саламалары түҥэттилэр. Саламалары баҕа санаабытын туһаайан туран баайан баран фойеҕа киирбиппит Амма хочотун чөмчүүгэ — сардаана сибэкки арааһа «Сардаанаттан кынаттанан» диэн быыстапкаҕа тэлгэммит, уһуйаан үлэтин сырдатар стендэ, фотозона оҥоһуллубут. Бэтэрээн үлэһиттэр үөрэ-көтө кэлэн, көрсөн, бэйэ-бэйэлэрин эҕэрдэлэһэн, уруйдаһыы үгүс буолла.
Уһуйаан кэлэктиибин, бэтэрээннэрин үбүлүөйдэринэн улуус баһылыга Степан Кузьмин, улуус дьокутааттарын Сэбиэтин бэрэссэдээтэлэ Владимир Колосов, үөрэх салалтатын начальнига Николай Ларионов, улуус физическай культура уонна спорт салалтатын начальнига Дмитрий Наумов, улуустааҕы балыыһа кылаабынай бырааһын солбуйааччыта Дмитрий Васильев, “Амма нэһилиэгэ” МТ баһылыгын солбуйааччыта Альберт Яковлев, “Амма-суол” ХЭТ салайааччыта Константин Слепцов, төрөппүттэр эҕэрдэ тылларын, бэлэхтэрин-туһахтарын, үлэ дьонун чиэстээн наҕараадалары туттардылар.
Уһуйаан иитиллээччилэрэ уонна кэлэктиип ыалдьыттарга олус үчүгэй кэнсиэри көрдөрдүлэр. Бары ырыаһыттарын, үҥкүүһүттэрин көрөн киһи эрэ сэргиир. Оҕолорбут барахсаттар олус үчүгэйдик туттан-хаптан олорон, ноолоон «Хороҕор муостаах Хобороонньо эмээхсин ынаҕа» диэн уһуйаан иитээччитэ Ульяна Прокопьева суруйбут олоҥхотун толордулар. Маанылаах сандалы тула уруккуну-хойуккуну санаһан, ол ыраах кэмҥэ төннөн ыллылар, баҕа санаа бастыҥын анаатылар. Көмүс үбүлүөй көмүстүү күлүмнээн чаҕылхайдык ааста. Үлэҕит өссө таһаарыылаах буоллун, ситиһиилэр сиэттиһэн кэлэн истиннэр, саҥа кэрдиис кэмҥэ саҥа саҕахтары, саҥа ааттары, саҥа арыйыылары диэн үбүлүөйдээх кэлэктиипкэ баҕа санаабытын тириэрдэбит.
Эмма ДАВЫДОВА