Амма улууһун үөрэҕин салаата оҕолору кэрэҕэ, үөрэххэ-билиигэ уһуйааччылары барыларын түмэн идэлээх күннэрин бэлиэтээн бастыҥнары наҕараадалаатылар, саҥа кэлбит эдэр учууталлары чиэстээтилэр.
Ф. Потапов аатынан Амматааҕы норуот айымньытын дьиэтигэр үс идэлээх күн тэҥинэн бэлиэтэннэ. Ол курдук үөрүүлээх чааһы ыытааччылар саалаҕа мустубут кэнчээри ыччаттарбытын билиигэ сирдээччилэри, ырыаҕа-тойукка уһуйааччылары, талааннарын арыйааччылары балаҕан ыйын 27 күнүгэр бэлиэтэммит Иитээччи күнүнэн, алтынньы 5 күнүгэр буолуохтаах Учуутал күнүнэн уонна алтынньы 8 күнүгэр үүнэр эбии үөрэхтээһин үлэһиттэрин күнүнэн истиҥник эҕэрдэлээтилэр. Онон барытын суулуу тутан бу эйгэҕэ таһаарыылаахтык үлэлии сылдьар бастыҥ үлэлээхтэргэ араас таһымнаах наҕараадалары туттардылар. Кинилэри улуус дьокутааттарын Сэбиэтин бэрэссэдээтэлэ Владимир Колосов, улуус баһылыгын социальнай боппуруостарга солбуйааччы Ньургуйаана Илларионова, үөрэх салаатын салайааччытын э.т. Татьяна Иванова уонна үөрэх үлэһиттэрин идэлээх сойуустарын бэрэссэдээтэлэ Прокопий Бытыров эҕэрдэлээтилэр, үөрэппит учууталларыгар махтаннылар.
“Мин эһигиттэн биири көрдөһүөм этэ. Бука бары бу махталлаах үлэҕитигэр хас сарсыарда аайы үөрэ-көтө, айымньылаахтык тута бараргытыгар уонна киэһэ үлэҕититтэн дуоһуйан, астынан кэлэргитигэр. Эһиги күннээҕи үлэҕититтэн биһиги оҕолорбут хайдах дьон буолан тахсаллара, олоҕу хайдах сыаналыыллара, дьоҥҥо сыһыаннара, уопсастыбаҕа сылдьыылара олус улахан тутулуктаах. Онон үлэҕит айымньылаах уонна тапталлаах буоллун”, — диэн Ньургуйаана Ивановна бэйэтин баҕа санаатын тириэртэ.
Бу күн улуус үөрэнээччилэрин икки ардыларыгар 2023-2024 үөрэх дьылыгар ыытыллыбыт комплекснай спартакиада түмүгүнэн кыайыылаахтарынан В.В. Расторгуев аатынан Амма 2№-дээх оскуолата уонна В.М. Новиков-Күннүк Уурастыырап аатынан Эмис орто оскуолата буоллулар. Иккис бочуоттаах миэстэҕэ В.Г. Короленко аатынан Амма 1№-дээх оскуолата уонна Чакыр орто оскуолата таҕыстылар. Онтон үһүс миэстэни академик Л.В. Киренскэй аатынан Амматааҕы лиссиэй уонна П.И. Яковлев аатынан Амма Наахара орто оскуолата ыллылар.
Үөрүүлээх тэрээһин долгутуулаах чааһынан үтүөнү, сырдыгы саҕааччыларга үрдүк наҕаарадалары туттарыы түгэнэ буолла. Үгүс элбэх учууталлар, наставниктар, иитээччилэр уонна эбии үөрэхтээһин педагогтара араас таһымнаах наҕаарадалары ыллылар. Ол курдук РФ үөрэҕин эйгэтин бочуоттаах үлэһитэ ааты Н.С. Захаров -Сахаачча аатынан оҕо спортивнай оскуолатын тустууга тренерэ Егор Скрябин, РФ Үөрэҕин министиэристибэтин бочуотунай грамотатынан А.П. Рязанскай аатынан Соморсун орто оскуолатын нуучча тылыгар уонна литературатыгар учуутала Светлана Дьячковская, Е.Л. Чистяков аатынан Майскай орто оскуолатын физкультураҕа уонна ОБЖ предметигэр учуутала Иван Макаров, “СӨ үөрэҕириитин туйгуна” бэлиэнэн Эмистэн “Чуораанчык” уһуйаан старшай иитээччитэ Наталья Константинова, “СӨ Учууталлар учууталлара” үрдүк ааты Е.Е. Пахомов аатынан Болугур орто оскуолатын алын кылааһын учуутала Мария Аммосова, физкультураҕа учуутала Прокопий Шестаков, “Мичээр” ОСК иитээччитэ Ульяна Борисова, И.И. Константинов-Дэлэгээт Уйбаан аатынан Сулҕаччы орто оскуолатын саха тылыгар уонна литературатыгар учуутала Венера Данилова, социальнай педагога Альбина Кириллина, А.П. Рязанскай аатынан Соморсун орто оскуолатын төрөөбүт тыл уонна литературатын учуутала Мария Ефремова, В.М. Новиков-Күннүк Уурастыырап аатынан орто оскуола географияҕа учуутала Анатолий Михайлов Алексеевич, “Хатыҥчаана” уһуйаан сэбиэдиссэйэ Саргылана Петрова, П.И. Яковлев аатынан Амма Наахара орто оскуолатын физкультураҕа учуутала Михаил Романов, Чакыр орто оскуолатын саха тылыгар уонна литературатыгар учуутала Сардана Романова, Н.Е. Иванов аатынан Бөтүҥ орто оскуолатын биологияҕа учуутала Оксана Семенова, А.Е. Кралин аатынан Абаҕа орто оскуолатын английскай тылыгар учуутала Татьяна Сутакова ыллылар. “СӨ оскуола иннинээҕи үөрэхтээһинин сайдыытыгар кылаатын иһин” бэлиэнэн “Ньургуһун” уһуйаан иитээччитэ Наталья Матвеева, “Кэнчээри” уһуйаан учуутал-логопеда Туйаара Романова, “Мичээр” уһуйаан иитээччитэ Айталина Степанова, “СӨ эбии үөрэхтээһинин сайдыытыгар кылаатын иһин” бэлиэнэн В.М. Новиков-Күннүк Уурастыырап аатынан орто оскуола эбии үөрэхтээһинин педагога Матрена Владимирова, О.П. Иванова-Сидоркевич аатынан Амматааҕы дьоҕуру сайыннарыы киин эбии үөрэхтээһинин педагога Валентина Иванова, Н.Е. Иванов аатынан Бөтүҥ орто оскуолатын ырыаҕа учуутала Любовь Лобанова, В.Г. Короленко аатынан Амма 1№-дээх оскуолатын автодьыалаҕа учуутала Анатолий Лягушин, Н.С. Захаров- Сахаачча аатынан оҕо спортивнай оскуолатын тренер-преподавателэ Михаил Неустроев, П.И. Караканов аатынан Мээндиги ортот оскуолатын эбии үөрэхтээһинин педагога Марина Удина, улуус дьокутааттарын Сэбиэтин бочуоттаах грамотатынан үөрэх салаатын уопсай үөрэхтээһини методическай арыаллааһын отделын начальнига Семен Шадрин наҕараадаланнылар. Үгүс көлүөнэ ыччаты иитиигэ сыраларын уурбут, күн бүгүн даҕаны бэйэлэрин үтүө сүбэлэрин биэрэ сылдьар бэтэрээн учууталлар “СӨ үөрэҕин систиэмэтин бочуоттаах бэтэрээнэ”, “Педагог-наставник” уонна “Бочуоттаах настваник. Амма улууһа” диэн түөскэ анньыллар бэлиэлэри туттулар. Маны тэҥэ эдэр учууталлар “Надежда Якутии” диэн үрдүк, элбэххэ эбээһинэстиир бочуоттаах бэлиэнэн наҕараадаланнылар.
Быйыл Амма улууһугар 14 эдэр учуутал ХИФУ-ну, Бүлүүтээҕи профессиональнай-педагогическай колледжы уонна Намнааҕы педагогическай колледжы бүтэрэн кэлэн балаҕан ыйыттан үлэлии-хамсыы сылдьаллар. Бу күн кинилэргэ өйдөбүнньүк бэлэхтэри туттардылар уонна үгэс быһыытынан уот, уу уонна алтан турба ортотунан ааһар сиэри-туому ыыттылар. Кинилэр кэнчээри ыччаты үтүөҕэ, сырдыкка уһуйар уустук, сыралаах, ол эрээри махталлаах үлэлэригэр ситиһиилээхтик үлэлииллэригэр баҕардылар.
“Амма олоҕо” хаһыат