Захар Александров баһылыктаах Амма Наахара нэһилиэгэр олохтоох бэйэни көҕүлээһин бырагырааматыгар кыттар түмүк мунньах Ийэ нэдиэлэтин декадатыгар түбэстэ. Нэһилиэккэ үгүс куолаһы ылан быйыл тутуллубут спортивнай былаһаакканы ситэрии кыайда.
Нэдиэлэ тухары Сардаана Лебедева салайар «Түмэн» сынньалаҥ киин үлэһиттэрэ спортивнай саала дириэктэрин Мария Заборовскаяны кытта Күн күбэй ийэлэргэ, эйэҕэс эбэлэргэ күн ахсын араас күрэхтэри ыыттылар. Ол курдук, сахалыы оонньууларга тыксаан, мас эрийиитэ, биэс ойбон, бадминтон, теннис, ох саа, бильярд, көрдөөх стартар күрэхтэрэ бэрт сэргэхтик аастылар. Биирдиилээн күрэххэ бадминтоҥҥа эдэр ийэлэргэ 1-кы миэстэни Марина Макарова, 2-с миэстэни Сардаана Лебедева, 3-с миэстэни Людмила Александрова, онтон эйэҕэс эбэлэрбитигэр 1-кы миэстэни Антонина Устинова, 2-с миэстэни Людмила Алексеева, 3-с миэстэни Любовь Никифорова ылан кыайыынан өрөгөйдөннүлэр.
Алтынньы 19 күнүгэр Саха сиригэр Ийэ күнүгэр аналлаах «Олох кэрэтин таламмын Ийэбэр бэлэхтиэм» диэн ийэлэргэ анаммыт бэлэх кэнсиэри уус-уран самодеятельность ППМИ мунньаҕын көхтөөх кыттааччыларыгар бэлэх ууннулар. Кэнсиэри баһылык Захар Семёнович эҕэрдэтинэн аста.
Ыраах улууска үлэлии-хамсыы сылдьар ыччаттарбыт төрөппүттэригэр видео эҕэрдэлэрэ кэрэ чааһы киэргэттэ. Кэнсиэр кэмигэр көрдөөх оонньуулар, киирии билиэтинэн лоторея оонньонно. Сүүйүүлээх дьон үөрүүлэрэ — көтүүлэрэ үксээтэ.
Ирина Корякина — Олесова.