Амма — Наахара нэһилиэгэр түөлбэлэр икки ардыларыгар Далбар Хотуттарга аналлаах «Women Day» диэн сэргэх күрэх икки бөлөххө араарыллан бэрт сэргэхтик ыытылынна. Манна барыта 7 кэрэ аҥар кыттаннар олохтоохторго бэртээхэй сынньалаҥы бэлэхтээтилэр.
Күрэҕи «Түмэн» сынньалаҥ киинин салайааччыта Светлана Захарова бэрт сэргэхтик ыытта. Дьүүллүүр сүбэҕэ Дмитрий Артамонов, Захар Александров, Павел Макаров уонна Илья Березкин үлэлээтилэр.
Бу дьоро күн бэйэтин эҕэрдэтин нэһилиэк баһылыга Захар Александров тириэртэ. Күрэх бииртэн биир интэриэһинэй 5 түһүмэҕинэн ыытылынна. Ол курдук, бэйэни билиһиннэрии, «Талба талаан», мода күрэҕэ ( 18- тан үөһээ саастаахтар спортивнай, 50-тан үөһэ саастаахтар киэһээҥҥи стиль), » Мейкап» ( атын кэрэ куоҕа бүрүчүөскэ, макияж оҥорон киэргэтии) уонна сахалыы сиэргэ-туомҥа аналлаах боппуруоска эппиэттээһин.
Күрэхтэһээччилэр бары да талба талааннаахтарын, мындыр сатабыллаах өйдөрүн, сахалыы кэрэ таҥастарын-саптарын, уустаан- ураннаан тикпит сахалыы таҥастарын, оҥорбут оҥоһуктарын, атын кэрэ аҥардары хас биирдиилэрин киэргэтэн, симээн көрдөрбүттэрэ, ону ааһан төрөөбүт дойдуларыгар олус бэриниилээхтэрэ көрөөччү биһирэбилин ылыан ылла.
Түмүккэ, 18-тан үөһэ саастаахтарга » Кэрэ Куо» уонна » Көрөөччү биһирэбилэ» үрдүк ааты Елена Кузьмина ылла. Ону кытта » Удьуор утума» анал ааты Лия Александрова, » Кэрэ көстүү» анал ааты Лилиана Ефремова уонна «Талба талаан» анал ааты Мария Пахомова ыллылар. Оттон 50 саастарыттан үөһэ саастаахтарга»Далбар Хотун» үрдүк аата Марианна Чеҥҥэ ананна. «Ураты дьоҕур» — Мотрена Петрова уонна «Мындыр өй» — Надежда Григорьева буолан үөрүүлэрэ үксээтэ, өрөгөйдөрө үрдээтэ. Бу дьоро күн көрөөччүлэри истиҥ иэйиилээх ырыаларынан кэрэ куоластаах Гаврил Александров, Светлана Захарова, Илья Березкин, » Дуораанчык» уһуйаан иитиллээччитэ Дархан Гаврильев, орто оскуола 3 кылааһын үөрэнээччилэрэ уо. д. а. эҕэрдэлээтилэр.
Саргылана МАРТЫНОВА, уопс. кэрэспэдьиэн