Бүгүн, олунньу 14 күнүгэр, Бүтүн Россиятааҕы «Кинигэни тапталынан бэлэхтээн» акцияҕа Амма лиссиэйин 2 «а» кылааһын үөрэнээччилэрэ олус көхтөөхтүк кытыннылар.
Учууталларын Соловьева Светлана Анастасовнаны кытта улуустааҕы оҕо библиотекатыгар тиийэн, 19 үөрэнээччи хас биирдиилэрэ 19 кинигэни бэлэх ууннулар.
Кырачаан ааҕааччылары библиотекарь Макарова Софья Владимировна үөрэ-көтө көрүстэ уонна махтал истиҥ тылларын анаата. «Суруллубут суоруллубат» дииллэринии, кинигэни кэрэхсиир, сэҥээрэр үөрүйэх оҕо кыра сааһыттан силистэнэр. Онно библиотекаҕа сылдьыы, кинигэ кэрэ эйгэтин кытта алтыһыы сүрүн төһүү күүс буолар.
Наталия Рязанская.