Бүгүн Аан дойду үрдүнэн Доруобуйаларынан хааччахтаах дьон күнэ бэлиэтэнэр. Билигин доруобуйа билимэ сайдан, ситэн турар кэмигэр хас биирдии киһи сыл ахсын доруобуйатын көрүнэр, эмтэнэр үйэтэ. Ол эрээри сорохтор ыалдьан, сорохтор араас олох моһоллоругар түбэһэн, сорохтор төрүөхтэриттэн доруобуйалара хааччахтаахтар. Статистика көрдөрөрүнэн маннык дьон олоххо актыыбынай киэҥ көрүүлээх, тулуурдаах, дьулурдаах буолаллар, доруобуйаларын туругун аахсыбакка, таһаарыылаахтык үлэлээн, олох үөһүгэр сылдьаллар. Оннук дьонтон биирдэстэринэн Амма Наахара нэһилиэгин олохтооҕо Владислав Сергеевич Константинов туһунан кэпсииргэ сананным.
Владислав Сергеевич ыам ыйын 26 күнүгэр 1965 сыллаахха Өнньүөскэ төрөөбүтэ. 1982 сыллаахха Болугур орто оскуолатын бүтэрэн совхозка рабочайынан үлэлии сылдьан армияҕа баран икки сыл ытык иэһин толорон сулууспалаабыта. Армия кэнниттэн салгыы совхозка кэлэн араас үлэҕэ үлэлии сылдьан 1987 с. табаарыс уолаттарын кытта ыҥырыы таһааран «Болугур» совхоз Өнньүөс отделениетын «Романтика» ферматыгар ыанньыксытынан үлэлии тахсыбыт. 1992 с. үлэлии сылдьан хараҕын эчэтэн инбэлииккэ тахсыбыта. 2000 сылтан Амма Наахара орто оскуолатыгар вахтер — харабылынан үлэлиир. Нэһилиэк, улуус, өрөспүүбүлүкэ күрэхтэригэр өрүү актыыбынайдык кыттар, миэстэлэһэр.
Владислав Сергеевич кэргэнинээн Александра Тихоновналыын 37 сыл кэтэх хаһаайыстыбаланан, эн-мин дэһэн иллээхтик олороллор, уоллаах кыыс оҕолоохтор, тапталлаах эбэ-эһэ аатын сүктүлэр. Үтүө ыал Дима диэн аймах уоллара тулаайах хаалбытын 1-гы кылаастан иитэн- үрэттэрэ сылдьаллар. 9 сыл ааста, этэргэ дөбөҥ. Дима тустуунан дьарыктанар, элбэх күрэхтэр кыайыылаахтара буола үүннэ. Бу Константиновтар дьиэ кэргэн бары үлэлэрэ, төрөппүттэр туохха да сыаналаммат иитии үлэлэрэ буолар.
Нэһилиэккэ ыытыллар тэрээһиннэргэ Владислав барытыгар кыттар. Кини доруобуйаларынан хааччахтаах дьон спартакиадаларыгар, араас күрэхтэригэр кыттан өрүү миэстэлэһэр. Аны үлэни өрө туппут киһи сайыннары от оттоон, кыһыннары сүөһү көрөн иллэҥ бириэмэтигэр ыллаан-туойан, мээчиктээн, дуобаттаан, өй күрэхтэригэр кыттар. Владислав нэһилиэк киэн туттар ыалын Аҕа баһылыга. Таптыыр кэргэнинээн Александралыын быр- бааччы олорон, саҥа үүнэр күннүүн тэҥҥэ хааман, сиэн минньигэс сытынан манньыйан, барыга холобур буолан этэҥҥэ буолуҥ, Өнньүөс нэһилиэгин бастыҥ ыала!
Ирина Корякина – Олесова.