Амма элбэх оҕолоох эдэр ыала Пешковтар төһө даҕаны күннэтэ үлэ үөһүгэр сырытталлар, дьиэ кэргэнинэн кыһыҥҥы тымныы күннэргэ тыаҕа тахсан кыыллары аһатар үтүө үгэстээхтэр. Инньэ гынан икки «куобаҕы тэҥинэн өлөрөллөр» — иллэҥ кэмнэрин бииргэ атаараллар уонна оҕолорун айылҕаҕа чугас буоларга, кинини харыстыырга, араҥаччылыырга кыра эрдэхтэриттэн уһуйаллар.
Амма 1 нүөмэрдээх оскуолатын учуутала Саргылаана Петровна уонна РЭС суоппара Андрей Владимирович Пешковтар олоххо олус көхтөөх дьон, нэһилиэк, тэрилтэлэрэ ыытар тэрээһиннэригэр куруук кытталлар. Үс оҕолорун эмиэ барыны-бары сэҥээрэргэ, олох үөһүгэр сылдьарга үөрэтэллэр. Биир холобуру аҕалан кэпсээтэххэ, улахан уоллара — Амма 1нүөмэрдээх оскуолатын 3 «б» кылааһын үөрэнээччитэ Алеша эһэтэ сирдээн айылҕаҕа сылдьарын туохтааҕар да ордорор. Пешковтар эһэлэрэ Петр Федорович Неустроев бултуур дьарыктаах буолан күтүөтүн, сиэнин бэйэтин кытта илдьэ сылдьан такайар. Ол курдук, икки сыллааҕыта Халаалы үрэххэ бараннар кыыллар аһыыр сирдэрин туппуттара. Наадалаах матырыйаалларын дьиэлэриттэн илдьэ баран бурдук, сенаж, от хаалларбыттара. Сотору-сотору баран көрөн-истэн, эбии ас ууран, кэлбит кыыллар кэлэн барбыт суолларын хаартыскаҕа түһэрэ сылдьыбыттара. Онтон былырыын Дьокуускайдыыр суолга бэлэм кормушка булан, ол сиргэ дьиэ кэргэнинэн тахсан кыыллары аһаталлар, кэтээн көрөллөр. Маны барытын саамай Алеша интэриэһиргиир, бэл диэтэр учууталын Туяра Яковлевна Попова көмөтүнэн «Кормушка для косуль» диэн кыһыҥҥы кэмҥэ кыыллары аһатыы туһунан чинчийэр бырайыак суруйан араас таһымнаах күрэхтэргэ, кэмпириэнсийэлэргэ көмүскүүр.
Быйыл өрөспүүбүлүкэтээҕи экология, ойууру туһаныыга уона ойуур хаһаайыстыбатын министиэристибэтэ тэрийбит «Экология дьиэ кэргэнтэн саҕаланар» куонкурус «Эковолонтер» хайысхатыгар иккис миэстэни ылан өрөгөйдөөтө.
-Биһиги оҕолорбут эмиэ, атыттар курдук, төлөпүөҥҥэ оонньуулларын сөбүлүүллэр. Ол эрээри, өрөбүллэрбитигэр, иллэҥ кэммитигэр, быыс буллубут эрэ тыаҕа, айылҕаҕа тахса сатыыбыт. Сырыыбыт сынньалаҥ эрэ буолбакка, туһалаах буоллун диэн кыыллары аһатабыт. Уолбут Алеша оскуолатыгар «Ойуур кыылларын аһатыы туһунан билэҕин дуо?» диэн ыйытык ыыппытыгар улахан дьон билэллэр эбит, онтон оҕолор — суох диэн түмүк оҥорбута. Ол иһин хайаан даҕаны сырдатыахха наада диэн санааттан сөбүлүүр дьарыкпытын чинчийэр үлэ хайысхалаан биэрдибит. Маннык дьиэ кэргэнинэн сылдьан үтүөҕ дьыалыны оҥорорбут оҕолорбут кэнэҕискитин аһыныгас санаалаах, тыынар тыыннаахха харыстабыллаах сыһыаннаах буола улааталларыгар көмө буолуо диэн бүк эрэнэбит,- диэн кэпсиир Саргылаана Петровна.
«Амма олоҕо» хаһыат.