А. Е. Кулаковскай-Өксөкүлээх Өлөксөй аатынан норуоттар доҕордоһууларын дьиэтигэр «Амма түмсүү» уопсастыбаннай хамсааһын Дьокуускай куоракка олорор биир дойдулаахтарыгар анаан аҕам саастаах дьон уонна учуутал күнүнэн «Күһүҥҥү күн күндүтүк санаһан» диэн дьоро киэһэни тэрийэн ыытта. Кэлбит ытык дьоммутун «Күндүл» Амма эдэр ыччатын хамсааһына көрүстүлэр.
Быйылгы көрсүһүү сэрии кэмигэр ыытыллыбыт Амма ыһыаҕын туһунан документальнай киинэ көрдөрүүттэн саҕаланна. Илья Жараев аатынан Саха Өрөспүүбүлүкэтин норуоттарын аудиовизуальнай нэҺилиэстибэтин национальнай киинин методиһа Марина Винокурова билиһиннэрдэ уонна киинэни көрө олорон сиһилии билиһиннэрдэ. Ону тэҥэ П.А. Ойуунускай аатынан литературнай түмэл научнай үлэһитэ, кыраайы үөрэтээччи Ефросиния Ноговицына Аммаҕа буолбут сэрии кэминээҕи ыһыах ырытыытын оҥорон дьон интэриэһин тарта.
Үгэс курдук, тэрээһин кэмигэр биир дойдулаахтарын бырааһынньыгынан Ил Түмэн Судаарыстыбаннай Мунньаҕын дьокутаата Александр Корякин Амма улууһун баһылыгын социальнай боппуруостарга солбуйааччы Ньургуйаана Илларионова, Амма улууһун бэтэрээннэрин Сэбиэтин бэрэссэдээтэлэ Мария Захарова эҕэрдэ тылларын, махтал суруктары туттардылар.
Салгыы Амма улууһуттан Галина Бочугурова, Оксана Архипова «Үлэ аргыстаах эдэр саас” («Моя трудовая молодость») проект чэрчитинэн хамаанданан оонньуу күрэҕин иилээн-саҕалаан ыыттылар. Манна уопсайа 14 киһи оонньууга кыттан дьоро киэһэ биир бэлиэ түгэнинэн буолла. Кыттааччыларга барыларыгар «Чуораанчык» оҕо-ыччат хаһыатын редакцията (биир дойдулаахпыт Матвеева Сардаана Анатольевна) туруорбут бириистэринэн, уонна сүрүн кыайыылаах Григорьева Тамара Григорьевна, “Амма түмсүү” –бүт туруорбут П.А. Ойуунускай академическай театрыгар спектакльга икки билиэтинэн наҕараадаланна.
Кэлбит ыалдьыттар бары итии чэйдээх сандалыга олорон тото-хана аһаан, ирэ-хоро кэпсэтэн, хаартыскаҕа түһэн, астынан тарҕастылар. Дьоро киэһэбитин Дьокуускай куорат 30№-дээх орто оскуола учуутала Мичийэ Матвеева иилээн-саҕалаан ыытта, уолаттарынаан эҕэрдэ ырыанан киэргэттилэр.
Александр КУЗЬМИН, “Амма түмсүү” салайааччыта