Баай Барыылаах Байанай ыйын бастакы өрөбүлүгэр Эмис нэһилиэгэр үгэскэ кубулуйбут оскуола үөрэнээччилэрин Муҥха бырааһынньыгар көхтөөхтүк кыттан кэллибит.
Биһиги оскуолабытыттан уопсайа түөрт уол уонна алта улахан дьон буолан тиийдибит. Кылаас салайааччыта Күннэй Давыдовна Чирикова уонна оскуола үлэһиттэрэ салайан илдьэ сырыттылар. Тэрээһиңңэ алта оскуола кыттыыны ылла. Дьолго тыала-хаара суох ичигэс күн турда. Муҥха Тэгэрээттэ эбэҕэ ыытылынна. Бастаан буоларын курдук, Баай Байанай иччитигэр анаан сиэр-туом оҥоһуллан алгыс тыл этилиннэ, алгыстаах алаадьынан уот аһатылынна. Кэлбит ыалдьыттар Күөх Боллох иччитин маанылаан алаадьылаатыбыт, көрдөстүбүт уонна махтанныбыт. Боҕуруоскай отунан сыт таһааран күн эргииринэн бары ыраастанныбыт, арчыланныбыт. Дьэ онтон күүстээх үлэ саҕаланна. Сүүһү кыайбат киһи бары ким–тугу үлэлиэхтээҕинэн арахсан тигинэччи үлэлээтибит. Эмис оскуолатын орто уонна улахан кылаас уолаттарын көрөн сөхтүбүт даҕаны, астынныбыт даҕаны.
Кинилэр улахан дьону кытта тэбис тэҥҥэ муҥха түһэрэр чардаатын быһаарыстылар, ойбон аллардылар, көхө туттулар, үтүмэх ыытыстылар, бэчимэ тардыстылар уонна нырыыһыт буолан барыны бары сатыырга үөрэнэллэр эбит. Биһиги нырыыһыттаатыбыт уонна балыгы үллэриигэ көмөлөстүбүт. Күөлтэн эбэ барахсан бэрсибит көмүс хахтаах соболору бастыбыт. Көрөргө үчүгэйин, биир кэм бидилийэ оонньуур. Тэгэрээттэ эбэ кими да атаҕаастаабакка күндүлээтэ. Собобут киһи ытыһын саҕа кээмэйдээх эбит. Муҥханы таһаарар сүрүн таасчыт киһибитигэр саамай улахан соболору булан мустубут уонна тиксэрдибит. Түмүккэ кэлбит дьон бары үөрэ-көтө үллэһэн өттүк харалаах, илии тутуурдаах дьиэбитигэр айаннаатыбыт. Эмис нэһилиэгин олохтоохторугар, тэрийээччилэригэр, илдьибит-аҕалбыт суоппарбытыгар Егор Эдуардович Бессоновка, дириэктэрбитигэр Акулина Семеновна Ивановаҕа уонна салайааччыларбытыгар махталбытын тиэрдэбит. Үтүө үгэс үйэлэргэ үллэ үксээтин, тэтимник тэнийдин!
Айдын ИВАНОВ, Радмир ДЬЯКОНОВ, «Платформа» медиа киин чилиэннэрэ