«Күндүл» Арассыыйаҕа икки саҥа үҥкүүнү сүрэхтээтэ

Амматааҕы Федот Потапов аатынан норуот айымньытын дьиэтин иһинэн үлэлиир  “Күндүл” үҥкүү ансаамбыла улууска киэҥник биллэр. Бу күннэргэ ансаамбыл дойду тэбэр сүрэҕэр ыытыллыбыт  “Кубок Москвы” диэн  III норуоттар икки ардыларынааҕы чемпионакка ыҥырыы тутан кыттыыны ылла. 


“ «Күндүл» үҥкүү ансаамбыл салайааччытынан хореограф Лидия Шакарова үлэлээбитэ номнуо уонча сыл буолла.  Үҥкүүһүттэр кыра,  орто уонна улахан бөлөхтөргө  арахсан аныгы, норуот үҥкүүлэрин туруоран араас  тэрээһиннэргэ кытталлар, күрэхтэргэ  ситиһиилэнэллэр. Бу күннэргэ ансаамбыл  кыра бөлөҕүттэн 8 оҕо «Туллуктар» үҥкүүнү уонна улахан бөлөхтөн 12 үҥкүүһүт «Арчы» диэн  дэйбиирдээх  саҥа туруоруллубут сахалыы үҥкүүнү  дойду тэбэр сүрэҕэр,  Москва куорат килбэйэр киинигэр  сүрэхтээтэ.    И.С. Тургенев аатынан  үтүөнү оҥорор Фонда  «Время творить» диэн бырайыагын  иһинэн сылын аайы искусство бары көрүҥэр ыытыллар «Кубок Москвы»  диэн норуоттар икки ардыларыннааҕы   3-с чемпионатыгар ансаамбылбыт ыҥырыллан кытынна.

Манна Арассыыйа араас регионнарыттан, тас дойдулартан тиийэ кэлэн күрэстэһэллэр.   Измайлово концертнай саалатыгар 20 миэтэрэ уһуннаах сценаҕа   ыам ыйын 2 күнүгэр  сарсыарда  эрдэ  6 аҥаар чаастан киэһэ 8 чааска  диэри генеральнай репетиция буолбута.  Ол кэнниттэн таҥаспытын уларыттыбакка  устунан сарсыарда  8 чаастан  10 чааска диэри  икки бөлөх  иккиэн конкурс бастакы блогар  кытынныбыт. Киэҥ  сир тэтимнээх олоҕор киирэн тахсыы бэйэтэ туспа интэриэһинэй  буолла. Рейтинэ үрдүк   буолан,  элбэх кыттааччылааҕынан сааланы, гримернайы, сыананы,  оннооҕор холлу мүнүүтэтигэр тиийэ туһаналларын уонна тутуһалларын туоһутунан буоллубут. Бүтэн   тахсарбытыгар  иккис блок кыттааччылара киирээри таһырдьа кэтэһэн  тураллара сөхтөрдө.   Биһиги итинник, бастакы  күҥҥэ уонна бастакы блокка түбэһэн,  өссө сарсыарда эрдэ бүтэн бэркэ  табылынныбыт. Онон түмүкпүтүн кэтэһэ таарыйа  Москва куораты көрдүбүт,  күрэҕи көрөн  билии -уопут эбиннибит. Түспүт хосторбутугар  Измайловаҕа иккилии буолан  уонна Кыһыл болуоссакка диэри 5 мүнүүтэ хаамыылаах сиргэ турар сахалар  гостиницаларыгар, хоско түөртүү буолан олордубут.

 

ВДНХ-ны, Третьяковскай галереяны, Останкинаны көрдүбүт, Москва устун автобуһунан уонна сатыы экскурсияларга, ону таһынан Оперетта театрыгар мюзиклга сырыттыбыт.

Үс күн  долгуйа кэтэһэн, итиччэ элбэх, итиччэ үчүгэй кыттааччылартан ордон туохха эмэ тиксэбит   дуу суох дуу дии сылдьан финалга наҕараадалааhыҥҥа  киирбиппититтэн  бары наһаа  үөрдүбүт. «Кубок Москвы»  25 анал бирииһиттэн биирдэстэрин  «За сохранение  народной традиции» .  3-й интернациональный весенний  конкурс-турнир  «Величие России»” диэн улахан анал  диплом туттубут. Ону таһынан, үҥкүү толоруутугар улахан бөлөх  1-кы степеннээх лауреат,  кыра бөлөх 2-с степеннээх  лауреат аатын ылан  үөрүүбүт өссө  үрдээтэ. Өссө биир саамай үчүгэйэ  25 бастыҥнар истэригэр киирэн  салайааччыбыт Лидия Федоровна  «Лучший хореограф» үрдүк  ааты ылан, мэтээлинэн, дипломунан наҕараадаланна. Онон   кыайыы кэһиилээх,   ситиһии  сиэтиилээх, сүргэбит  көтөҕүллэн, иннибитигэр элбэх былааннаах дойдубутугар эргилиннибит.

 

Сырдыкка, кэрэҕэ угуйар, уһуйар Лидия Федоровнабытыгар, урукку өттүгэр сыанаҕа  тахсыбатах, үҥкүүлээбэтэх дьону тулуурдаахтык, дьулуурдаахтык үөрэтэн — такайан,  улахан эппиэтинэс  сүктэрэн, биһигини киэҥ  эйгэҕэ таһааран  үүннэрэн-сайыннаран  ситиһиилэммиппитигэр истиҥ махталбытын тиэрдэбит уонна айар-тутар үлэтигэр өссө үрдүк ситиһиилэри баҕарабыт. Барарбытыгар  кэс тыл этэн,  алҕаан атаарбыт норуот айымньытын дьиэтин дириэктэригэр Петр Алексеевич Кулаковскайга  бу сыллар тухары көстүүммүтүгэр матырыйаалынан көмөлөһөрүгэр,  конкурстарга кыттарга массыынанан хааччыйарыгар  улахан махталбытын тиэрдэбит.  Тарбахтарыгар талба талааннаах иистэнньэннэрбит,  тып-тап курдук  улахан бөлөх көстүүмүн тикпит урбаанньыт Ольга Артемьеваҕа, оҕолор көстүүмнэрин тикпит Ирина   Алексееваҕа,  былааччыйалары барыбытыгар уурбут-туппут курдук тигэн таһаарбыт  Алена Захароваҕа барҕа махталбытын  этэбит. Коллективпыт энтузиаст үҥкүүһүттэригэр,  танаспыт дизайнын оҥорбут, тигиитигэр көмөлөспүт бөлөхпүт старостатыгар Софья Ивановаҕа,  ансаамбыл көстүүмнэрин  айан таһаарар  Вера Шиловаҕа,  Дагестантан барыбытыгар үҥкүү  соппуоскатын сакаастаан  кэтэппит  Анастасия Дьячковскаяҕа, чэпчэки гостиница  сакаастаан санаа хоту  хоно сылдьыбыппытыгар Екатерина Корниловаҕа анал махтал тылларын этэбит. Анаан алҕаан суолбутун арыйбыт алгысчыт Мария Бурцеваҕа истиҥ үтүө тылбытын аныыбыт”, — диэн ансаамбыл кыттыылааҕа  Лариса Никифорова — Баһылай кыыһа үтүө сонунун үллэһиннэ.

 

“Амма олоҕо” хаһыат

Читайте дальше