Аҕам саастаах дьон уонна «Белая трость» декадалар чэрчилэринэн Амма улууһун социальнай харалта сүрүннүүр үлэһиттэрэ Амма Наахара нэһилиэгэр үлэлээтилэр. Көрсүһүүгэ элбэх киһи сылдьан кыһалҕаларын быһаарыстылар.
Ол курдук, төлөбүр салаатын салайааччыта Ольга Алексеевна Осипова уонна социальнай харалта киинин сүрүн исписэлииһэ, бэйэбит кийииппит Анна Николаевна Пахомова нэһилиэнньэни кытта ыкса үлэлээтилэр. Бу күн уот уонна отопление төлөбүрүн, Үлэ бэтэрээнигэр көрүллэр көмөлөрү, компенсация оҥоһуллуутун, социальнай контракт, ЕДВ, оскуола оҕотун таҥаһыгар көмө харчытын, араас саҥа төлөбүрдэри, эмтэнэр кииннэргэ путевка о.д.а. боппуруостар тустарынан 27 киһи биллэ-иһиттэ.
Айылҕа ардыы турар кэмигэр аҕыс уон килэмиэтэрэни айанныы барбакка маннык көрсүһүүлэр ыытыллыллара дьону үөрдэр. Социальнай харалта баар буолан кырдьаҕастар, инбэлииттэр тыын суолталаах көмөнү ыллылар. Исписэлиистэр дьоҥҥо-сэргэҕэ кыһамньылара, күүс-көмө буолуулара, сүбэлэрэ-амалара хас биирдии киһиэхэ тирэх буолар. Бу курдук биир күһүҥҥү күн киэҥ дабааһыннаах уонна олус туһалаах үлэ тэрилиннэ.
Ирина Корякина – Олесова.