Амма улууһун баһылыгын бастакы солбуйааччыта Василий Бураев тэрилтэлэр кыстыкка бэлэмнэрин боппуруостарыгар анаммыт ыксаллаах быһыы-майгы хамыһыйатын мунньаҕын ыытта. Манна кыттыыны хамыыһыйа бэрэссэдээтэлин солбуйааччы Эдуард Прокопьев кыттыыны ылла. Тэрилтэлэр, ордук чуолаан үөрэх тэрилтэлэрэ бэлэмнэрэ болҕомтоҕо турда. Нэһилиэктэр ВКС нөҥүө кытыннылар.
Хамыыһыйа мунньаҕын саҕалыырыгар баһылык бастакы солбуйааччыта быйылгы сылга ойуур баһаарын туруктарын билиһиннэрдэ, кыстык кэмигэр тахсар бары түбэлтэлэргэ бэлэм буолуохтааххыт диэн эттэ. Василий Иванович иһитиннэрбитинэн сааскыттан саҕалаан 23 ойуур баһаара регистрацияламмыт. Баһаардар кэҥээбэккэ кэмигэр умуоруллубуттар. Ол гынан баран күн бүгүн нэһилиэктэргэ баһаартан сэрэтэр балаһалары оҥорууга кыһалҕалар бааллар. «Ити эрээри сокуон син биир ирдиир, онон балаһалары оҥорууга салгыы үлэ барыан наада», — диэн Василий Бураев нэһилиэк баһылыктарыгар туһаайда.
Кыстык биир сүрүн боппуруоһа хочуолунайдар бэлэмнэрэ буолар. Маныаха ГУП ОДьКХ Амматааҕы филиалын салайааччыта Виктор Кузнецов иһитиннэрбитинэн, итиини биэриигэ өрөмүөн үлэтэ 88 бырыһыаҥҥа тэҥнэһэр. Коммунальнай хаһаайыстыба үлэһиттэрэ итиини кэмигэр биэрэргэ бэлэмнэр. Ол курдук үлэ сүрүннээн балаҕан ыйын 1 күнүгэр бүтэн, балаҕан 7 күнүгэр сылаас бары эбийиэктэргэ холбонуохтаах. Сайын устата 3,5 км трасса уларыйыыта бүтэн эрэр. Оттук саҕаланыытыгар чох баар. Ити эрээри сылаас толору хааччыллыытыгар улахан оруоллаах ититэр ситими уунан ыраастааһыны сорох тэрилтэлэр ыыппаттара итэҕэс быһыытынан этилиннэ. Социальнай эбийиэктэртэн саамай элбэх ахсааннаах үөрэх тэрилтэлэрэ бэлэмнэрин туһунан улуустааҕы үөрэх управлениетын салайааччытын солбуйааччы Анна Кутургуина иһитиннэрдэ. Оскуолалар, уһуйааннар сотору кэминэн саҕаланыахтаах үөрэх дьылыгар бэлэмнэр, арай сорох оскуолаларга септик өрөмүөннэрэ бара тураллар. 9№ -дээх баһаарынай чаас начальнигын э.т. Егор Федоров 18 баһаар тахсыбытын, ордук чуолаан бу баһаардар баһаарынай этэрээт суох сирдэригэр барбыттарын бэлиэтээн эттэ. Болугур, Мээндиги, Амма нэһилиэктэрэ баһаарынай чааһы кытта бииргэ ситимнээхтик үлэлииллэрин хайҕаата.
«Атырдьах ыйын 25 күнүттэн балаҕан ыйын 30 күннэригэр диэри үөрэх тэрилтэлэригэр оҕолорго куттал суох буолуутун хааччыйыыга месячник ыытыллыа. Манна бары баһаарынайдар, госавтоинспекция үлэһиттэрэ, ууттан сэрэхтээх буолуу инспекцията оскуолаларга кылаас чаастарыгар сылдьыахтара. Хомойуох иһин бу хамыһыйа мунньаҕар уот тэрилтэтиттэн кэккэ биричиинэнэн кыттыыны ылбатылар«,- диэн ЫБМ хамыыһыйатын бэрэссэдээтэлин солбуйааччы Эдуард Прокопьев санаатын үллэстэр.
Ааптар: «Амма олоҕо» хаһыат