Н.Е.Иванов аатынан Бөтүҥ орто агро оскуолатын үөрэнээччилэригэр үтүө үгэскэ кубулуйбут күүтүүлээх «Бэлимиэн бырааһынньыга» буолла.
Сэтинньи ыйга саха киһитигэр күүтүүлээх идэһэ кэмэ саҕаланар. Биһиги оскуолабыт агрохайысхалаах буоларынан, идэһэ нэдиэлэтэ күргүөмнээхтик бара турар. Идэһэ астааһыныгар оҕолору эмиэ тэҥҥэ сыһыаран араас үлэҕэ үөрэтэллэр-такайаллар. Саха төрүт үгэстэригэр иитиигэ сылын аайы ахсыс кылаас уолаттара идэһэ астыыллар. Оттон кыргыттара иһирдьэ ис сууйуутугар, кырбааһыныгар көмөлөһөллөр. Онтон салгыы бэһистэн 11-с кылааска диэри бэлимиэн астыырга үөрэнэбит. Оҥорбут бэлимиэммитин биир күн тото-хана сиибит. Ол курдук 15 киилэ минньигэс бэйэ сүөһүтүн этиттэн бэртээхэй бэлимиэннэри оҥордубут. Повардарбыт мииҥҥэ кутан буһарбыттарын дуоһуйа-астына амсайдыбыт.
Сыллата ыытыллар Идэһэ бырааһынньыгар нэһилиэнньэҕэ анаан оскуола хас биирдии үлэһитэ уонна үөрэнээччитэ тус кылаатын киллэрсэн атыыга хамаҕатык таһаарар. Сылын аайы сакаас элбиир, бэл диэтэр бастайааннай атыыһыттар өрүү ыйыталаһаллар уонна кэтэһэллэр. Элбэх субуотунньуктарга бэйэ бородууксуйатын: бэлимиэни, кытаайыскай бэлимиэни, тиэптэли, кэтилиэти оҥорон бэлэмниир соруктаахпыт. Онон, улуу Москуба куоратыгар биһиги сөбүлүүр бэлимиэммит бэйэ бородууксуйа күрэҕэр кыттан көмүс мэтээл ылан олус минньигэс, күндү ас буоларын өссө биирдэ бигэргэттэ. Барыгытын Идэһэ бырааһынньыгынан эҕэрдэлиибит уонна ыҥырабыт. Кэлиҥ, сэргээн, атыылаһыҥ, чэгиэн доруобай буолуоҕуҥ!
Латифа МАРКОВА, Виолетта ИВАНОВА, «Платформа» медиа киин чилиэннэрэ