Арассыыйаҕа — Дьиэ кэргэн, Саха сиригэр Оҕо саас сылынан Дьокуускай куоракка өрөспүүбүлүкэтээҕи “Ийэм, аҕам уонна мин — спортивнай дьиэ кэргэн” диэн уһуйаан саастаах оҕолор дьиэ кэргэттэригэр күрэх ыытылынна. Күрэххэ Амма улууһун чиэһин Эмистэн Ларионовтар дьиэ кэргэн ситиһиилээхтик көмүскээтилэр.
Күрэххэ араас улуустартан кыайыылаах 13 дьиэ кэргэн кэлэн илин-кэлин түһүстүлэр. Амма улууһун аатыттан Эмис нэһилиэгиттэн «Чуораанчык» уһуйаантан Ульяна Федоровна, Александр Александрович Ларионовтар, уоллара Германы кытта кыттан чиэстээхтик көмүскээтилэр. Ларионовтар бу күрэххэ хаһыс да төгүлүн ситиһиилээхтик кытталлар. Ол курдук кинилэр улууска 2019, 2022, 2024 сылларга бастааннар, өрөспүүбүлүкэҕэ 2019 сыллаахха Виолетта диэн кыыстарынаан, онтон 2022 сылга Анелялыын кыттаннар бастакы, онтон быйыл Германныын 3-с миэстэ буоллулар.
Биэс оҕолоох Ульяна, Александр оҕолорун эт-хаан өттүнэн сайдалларыгар өрүү өйүүллэр, бары күрэхтэргэ кыттан оҕону кыра сааһыттан олоххо активнай позициялаах дьон буолалларыгар иитэллэр, көҕүлүүллэр. Уһуйаан физкультураҕа инструктора Нонна Ноговицына маннык күрэхтэри көҕүлүүр, оҕолору, төрөппүттэри утумнаахтык эрчийэр, күрэххэ бэлэмниир. Улуус чиэһин өрөспүүбүлүкэҕэ үс төгүл көмүскээбит, онтон иккитигэр кыайыылаах, бииргэ 3 бочуоттаах миэстэҕэ тахсыбыт дьиэ кэргэн арааһа суоҕа буолуо. Ларионовтар дьиэ кэргэттэрин бириистээх миэстэҕэ тиксибиккитинэн, улуускут аатын ааттаппыкытынан эҕэрдэлиибит! Баҕарабыт эһиги дьиэ кэргэҥҥэ чөл туругу, или-эйэни, дьолу-соргуну.
Эмма ДАВЫДОВА, улуустааҕы үөрэх салаатын исписэлииһэ