1972 сыл бэс ыйыттан тыа хаһаайыстыбатын управлениетын начальнига Гаврил Николаевич Степанов миигин Соморсун нэһилиэгин Ленин аатынан холкуоска биригэдьииринэн мэктиэлээн, Иж Юпитер кэлээскэлээх матасыыкыл фондатын анаан ыыппыта. Ол матасыыкыл инники үлэбэр улахан көмөлөөх буолбута.
Ленин аатынан холкуос оччолорго икки нэһилиэгинэн тайаан сытара. Оройуоҥҥа уонна өрөспүүбүлүкэҕэ үчүгэй үлэлээх миллионер хаһаайыстыба этэ. Холкуос бас билэр сирин иэнэ 30994 гектар, ол иһигэр оттонор ходуһата – 5722 га, мэччирэҥэ – 6770 га, бурдугун сирэ – 1362 га этэ. Ынах сүөһү уопсай ахсаана – 2184 этэ, ол иһигэр ыанара – 890. Сылгыта – 1793, ол иһигэр төрүүр биэтэ – 870. Ити кэмҥэ холкуос 32 араас мааркалаах тыраахтардааҕа, 16 автомассыыналааҕа, үс бурдук быһар комбайннааҕа. 1972 сылга барыта 9412 центнер үүт ыаммыта, эти оҥоруу тыыннаах ыйааһынынан 3116 центнергэ тэҥнэспитэ. Бурдук 700 гектарга ыһыллыбытыттан 345 гектарыттан 2330 центнер бурдук хомуллубута. 37660 центнер от зеленкалыын бэлэмнэммитэ. Ньирэй дьыалабыай тахсыыта – 81, кулун – 72,9 бырыһыан буолбута.
-
1972 сылга холкуос үлэһиттэринэн 1 мөл. 668 тыһ. 335 солкуобайдаах баалабай бородууксуйа оҥоһуллубута. Холкуостаахтар ыйдааҕы орто хамнастара 183,5 солк. тэҥнэспитэ. Оччотооҕуга ити улахан хамнас этэ.
Холкуос бэрэссэдээтэлинэн 1968 сылтан салайар үлэҕэ уопуттаах Петр Иванович Чярин үлэлиирэ. Холкуос икки биригээдэлээҕэ: 1-кы нүөмэрдээх Соморсун биригээдэҕэ ыстаарсай биригэдьииринэн Спиридон Спиридонович Капитонов, сүөһү иитиитин биригэдьииринэн Гаврил Афанасьевич Неустроев, оттон 2-с нүөмэрдээх Сулҕаччы биригээдэҕэ ыстаарсай биригэдьииринэн Роман Евстапьевич Кириллин, 1974 сыл күһүнүттэн Строд аатынан сопхуос отделениетын сүөһү иитиитин биригэдьииринэн Руслан Григорьевич Флегонтов үтүө суобастаахтык үлэлээбиттэрэ. Холкуос кылаабынай зоотехнигынан Иннокентий Васильевич Львов, кылаабынай ветбырааһынан Надежда Михайловна Охлопкова, кылаабынай агрономунан Владимир Семенович Ефремов, кылаабынай мэхээнньигинэн Семен Григорьевич Бытыров, кылаабынай бухаалтырынан Спиридон Дмитриевич Старостин уонна биригээдэлэр ыстаарсай сылгыһыттара Соморсуҥҥа – Егор Михайлович Васильев, Сулҕаччыга – Михаил Петрович Неустроев бырабылыанньа чилиэттэрэ этилэр. Петр Иванович бырабылыанньа чилиэттэрин, исписэлиистэрин биир сыалга түмэн таһаарыылаахтык үлэлээбитэ. Кини үлэлээбит кэмигэр сүөһү ахсаана элбээбитэ, бородууксуйа үрдээбитэ.
1974 сыл бэс ыйын 21 күнүгэр холкуос тэриллибитэ 50 сыллаах үбүлүөйдээх ыһыаҕа ыһыллыбыта. Ыһыаҕы тэрийэр хамыыһыйа солбуйааччы бэрэссэдээтэлэ Анна Ефимовна Дьячковская нэһилиэк тэрилтэлэрин, дьахтар кэмитиэтин түмэн, элбэх тэрийэр үлэни ыыппыта. Партком сэкирэтээрэ Спиридон Спиридонович Капитонов, олохтоох Сэбиэт бэрэссэдээтэлэ Христофор Афанасьевич Носов хамыыһыйа үлэтин сүрүннэспиттэрэ, көмөлөспүттэрэ. Егор Христофорович Михайлов кыладыапсык-кэмэндээнинэн ананан үбүлүөйдээх ыһыах аһын-үөлүн дьаһайан, Ленин аатынан холкуос 50 сыллаах үбүлүөйүн 3000 ыалдьыттарын тото-хана аһатары ситиспитэ, улахан тэрээһиннээҕин, дьаһаллааҕын көрдөрбүтэ.
Үбүлүөйдээх ыһыахха Саха тыйаатырын артыыстара кыттыылаах улахан кэнсиэр көрдөрүллүбүтэ, үгүс бастыҥ үлэлээх үлэһиттэр, бэтэрээн холкуостаахтар, үлэлээбит салайааччылар сыаналаах бэлэхтэринэн, харчынан бириэмийэлэммиттэрэ. Саха төрүт ыстаныыларыгар, хапсаҕайга, ханаат тардыһыытыгар элбэх кыттааччылаах эрийсиилээх күрэхтэр ыытыллыбыттара. Өрүс үрдүгэр нэһилиэктэр холкуостарын сүүрүк сылгыларын күрэхтэһиилэрэ хатыһыылаахтык ааспыта. Ат сүүрдүүтүгэр Строд аатынан (тренер Гаврил Семенов) уонна Ленин аатынан холкуос сүүрүктэрэ кыайыылаах тахсыбыттара.
Тэрийэр хамыыһыйа бэрэссэдээтэлэ Николай Иванович Жирков салайан ыһыах үрдүк таһымнаахтык, дьоҥҥо умнуллубат өйдөбүл буолар гына ыытыллыбыта.
Алексей ФИЛИППОВ, СӨ тыатын хаһаайыстыбатын үтүөлээх үлэһитэ, Амма улууһун, Мээндиги нэһилиэгин бочуоттаах олохтооҕо.
Алексей Егорович Филиппов Ленин аатынан холкуоска уонна Строд аатынан сопхуос Соморсуннааҕы отделениетыгар үлэлээбит сылларын туһунан сиһилии ахтыытын «Амма олоҕо» хаһыакка ааҕаарыҥ.