Амматааҕы академик Л.В. Киренскэй аатынан лиссиэйгэ 30-с төгүлүн үөрэнээччилэр, төрөппүттэр уонна учууталлар саҥа үөрэх дьылын үөрэ-көтө көрүстүлэр. Быйыл оскуола боруогун 35 үөрэнээччи аан маҥнай атыллаата.
Оҕолор сарсыарда кылаас чаастарыгар «Арассыыйаҕа педагог уонна наставник» сылын чэрчитинэн биһиги оскуолабытыгар өр сылларга үлэлээбит бэтэрээн учууталлары ыҥыран иһирэхтик кэпсэттилэр, сүбэ — ама ыллылар. Саҥа үөрэх дьыла этэҥҥэ ааһарыгар, үөрэнээччилэргэ, выпускниктарга анаан география учуутала Алена Вячеславовна Быстрова алгыс тылларын эттэ.
Линейкабыт Арассыыйа былааҕын көтөҕүүттэн уонна дойдубут Өрөгөй ырыатынан саҕаланна. Былаах көтөҕөр чиэс быйыл Сэбиэскэй Сойуус икки төгүллээх геройа, летчик-космонавт В.Ф Быковскай аатын сүгэр Юнармейскай этэрээт иитиллээччилэригэр, Норуоттар икки ардыларынааҕы интеллектуальнай оонньууларга бронза призер буолбут 9 «а» кылаас үөрэнээччитигэр Владислав Уваровка уонна өрөспүүбүлүкэтээҕи «Старт в Космос» олимпиада кыайыылааҕар, быйыл сайын бэс ыйыгар ыытыллыбыт «Восточнай» космодромҥа «Союз 2.1б» ракета көтөрүгэр сылдьыбыт экспедиция кыттыылааҕар, 9 «а» кылаас үөрэнээччитигэр Алексей Слепцовка бэрилиннэ.
Лиссиэй дириэктэрэ, СӨ үтүөлээх учуутала, СӨ үөрэҕириитин туйгуна Дария Иннокентьевна Захарова үөрэнээччилэри, төрөппүттэри уонна учууталлары саҥа үөрэх дьыла саҕаламмытынан эҕэрдэлээтэ. Дойду Бэрэсидьиэнэ Владимир Путин биллэрбит быйылгы «Педагог уонна наставник» сылынан уонна «Спасибо учителю» Бүтүн Арассыйатааҕы акция чэрчитинэн, нуучча тылын уонна литературатын учуутала, СӨ үтүөлээх учуутала, СӨ үөрэҕириитин туйгуна Любовь Александровна Шилова сүрдээх истиҥник — иһирэхтик эҕэрдэ тылларын бииргэ үлэлиир коллегаларыгар, лиссиэй үөрэнээччилэригэр эттэ.
Лиссиэй үөрүүлээх түгэнин СӨ экэниэмикэтин миниистирэ Майя Андреевна Данилова, Амма улууһун баһылыгын бастакы солбуйааччы Василий Иванович Бураев, Амма нэһилиэгин баһылыгын социальнай боппуруостарга солбуйааччы Василий Петрович Дьяконов үллэһиннилэр, оҕолорго, ыалдьыттарга уонна лиссиэй коллективыгар быйылгы үбүлүөйдээх үөрэх дьыла таһаарыылаах буоларыгар баҕардылар, «Точка роста» федеральнай ситим үөрэх киинин үөрүүлээх арыллыытыгар ыалдьыттаатылар.
Петр ПЛАТОНОВ, дириэктэри иитэр үлэҕэ солбуйааччы