Амматааҕы академик Л.В. Киренскэй аатынан лиссиэйгэ үөрэх дьылын иккис чиэппэрэ Саха норуодунай суруйааччыта Василий Егорович Васильев -Харысхал аатынан саҕаланна.
Лиссиэй саха тылыгар учуутала Мария Ноговицына уонна медиатека үлэһиттэрэ, педагог- бибилэтиэкэрдэр Анна Алексеева, Людмила Оконешникова холбоһуктаах бырайыактарын чэрчитинэн кылаастарга Баһылай Харысхал «Эһэм эһэтэ» уонна «Тураҕааскы» кэпсээннэрин ааҕыы, ырытыыны буолла. Дойдубут патриотун үтүө аатыгар сүгүрүйэн сэтинньи 8 күнүгэр тохсус кылаас 17 оҕото учууталларын кытта Мээндиги — Соморсун хайысханан олус дириҥ ис хоһоонноох, сэргэх сырыыга сылдьан кэллибит. Мээндиги нэһилиэгин бибилэтиэкэрэ уонна бэйэтин үтүө баҕатынан олохтоох түмэли төрүттээччи, тутан олорооччу Мотрена Захарова библиотечнай уруогар норуодунай суруйааччы Баһылай Харысхал олоҕун кэрчиктэрин кэпсээн баран, айымньыларынан оҕолорго бэрт судургу эрээри туһалаах ньыманан, кылгас аннотацияларынан Харысхал кинигэлэрин көрдөрүү быыстапкаттан булларда уонна кылгас ис хоһоонун аахтарда. Кини олус долгутуулаахтык уонна умсугутуулаахтык, ис- иһиттэн сырдаан олорон Мээндиги кэрэ- бэлиэ сирдэрин, номохторун кэпсээтэ.
Ол кэнниттэн Мээндиги оскуолатын бырайыагынан оҕолор, учууталлар уонна Мотрена Николаевна бары кыттыһан кичэйэн оҥорбут «Буойун кириэһэ» диэн 38 мүнүүтэлээх олус интириэһинэй киинэни кэрэхсии, сөҕө көрдүбүт. Бу киинэҕэ мээндигилэр кыраайы үөрэтээччилэр Михаил Алексеевы, Калистрат Кириллини, Илья Колосовы кытта Билиистээх сэриитин туһунан кырдьыктаах чахчыларга олоҕуран баччааҥҥа диэри соччо- бачча ким да билбэт, итэҕэйбэт кырдьыгын арыйбыттар, киэҥ эйгэҕэ сырдаппыттар. Мотрена Николаевна түмэлэ биир туһунан уһун кэпсээн уонна кэрэхсэл. Кини хас биирдии экспонаты хараҕын харатын курдук харыстыыра, сыаналыыра, нэһилиэгин остуоруйатын биэс тарбах курдук билэрэ өтө көстөр. Кинини биһиги дьиҥнээх «Первые» хамсааһын киһитэ эбит диэн сыаналаатыбыт. Мантан салгыы биһиги Мээндиги оскуолатын остолобуойугар эбиэттээтибит. Людмила Романовна Албан аат болуоссатыгар эһэтин Василий Иннокентьевич Федоров — Баччааскы мэҥэ тааһыгар сүгүрүйэн сибэкки дьөрбөтүн уурда. Мээндигигэ сырыыбытын Баһылай Харысхал аатынан пааркаҕа суруйааччы пааматынньыгар Мээндиги оҕолорун, учууталларын кытта сылдьыынан түмүктээтибит. Суруйааччы пааматынньыгар сибэкки дьөрбөтүн уурдубут. Мээндиги кыһыҥҥы кэрэ көстүүтүн астына көрдүбүт, ыраас салгынынан тыынныбыт. Салгыы Соморсун оскуолатын педагог- бибилэтиэкэрэ Анисия Готовцева ыҥырыытынан Соморсуҥҥа айаннаатыбыт.
Манна биһиги Баһылай Харысхал аатынан саха тылын уонна литературатын үөрэтэр кылааска сырыттыбыт. Салгыы сибээстэһиэх, алтыһыах буолан сөбүлэстибит. Анисия Гаврильевна биһиэхэ оскуола түмэлин көрдөрдө, бибилэтиэкэтин кытта билиһиннэрдэ. Сырыыбыт табыллан, бэртээхэй экскурсияҕа сылдьан элбэх саҥаны билэн астынан кэллибит. Сырыыбыт туһалаах, дириҥ ис хоһоонноох буоларын хааччыйбыт Мотрена Николаевнаҕа, Анисия Гаврильевнаҕа, сып сылаас автобуһунан устар ууну долгуппакка айаннатан аҕалабы суоппарбытыгар Христофор Христорович Слепцовка, көрдөһүүбүтүн өйөөбүт лиссиэйбит дириэктэригэр Дария Иннокентьевна Захароваҕа ис сүрэхпититтэн махтанабыт.
Анна АЛЕКСЕЕВА, педагог — бибилэтиэкэр