Бүгүн Саха Өрөспүүбүлүкэтин Судаарыстыбаннаһын күнүгэр Амматааҕы академик Л.В. Киренскэй аатын лиссиэй учууталлара уонна педагог-библиотекарь Анна Алексеева түмэн оҥорбут «Михаил Ефимович Николаев — Үйэ киһитэ» диэн ааттаах демонстрационнай плакаттарын сүрэхтээтилэр.
“2022 сыллаахха сэтинньи 13 күнүгэр өрөспүүбүлүкэбит бастакы Бэрэсидьиэнэ Михаил Николаев 85 сааһын туолбута. Бу үбүлүөйдээх сыл чэрчитинэн тумус туттар киһибит олоҕун, айар үлэтин сырдатар ис хоһоонноох Бүтүн Арассыыыйатааҕы “Дьоһуннааҕы кэпсэтии” диэн кылаас чааһын иһинэн, лиссиэй учууталларын методическай хомуурунньуктарын оҥорор санаа биһиэхэ киирбитэ. Ол курдук бастаан оскуолабыт иһинэн, онтон улууска хомуурунньук оҥорорго күрэх ыыппыппыт. Бу күрэхпитигэр ордук көхтөөхтүк Амма 2-с нүөмэрдээх, Майскай, Чапчылҕан уонна лиссиэй учууталлара кыттыбыттара. Билэрбит курдук, Михаил Ефимович үлэлэрэ тус бэйэтин олоҕун уопутуттан, духуобунай, сиэр-майгы иитиитигэр патриоттуу сыһыаны иитэр, дойдубут историятын, култууратын, экологиятын сырдатар ис хоһоонноохтор. Кини кинигэлэригэр аныгы үөрэхтээх, сайдыылаах, бары өттүттэн дэгиттэр эдэр ыччат идеала көстөр дии саныыбын. Бырайыакпыт салгыы кэҥээн, Саха сирин Бэрэсидьиэнин ситимин оскуолаларыгар, биһиги лиссиэйбит дириэктэрэ Дария Иннокентьевна Захарова ыҥырыытынан методическай хомуурунньук оҥорорго челлендж биллэрбиппит. Бу бырайыакпыт чэрчитинэн номнуо олус үчүгэй ситиһиилэрдээхпит. 2023 сыллаахха сайын Чурапчыга педагогическай дьаарбаҥка буолбута. Онно бу бырайыакпыт бочуоттаах 2-с миэстэни ылбыта. Эмиэ бу сыл күһүнүгэр «Айар үлэ амтана» диэн өрөспүүбүлүкэтээҕи семинарга кыттыбыппыт. Бу семинарга С.А. Новгородов аатынан “Айар” кинигэ кыһатын үлэһиттэрэ демонстрационнай плакаттары оҥоруоҕуҥ диэн этии киллэрбиттэрэ. Онон дьэ бары бэрт түргэнник биир санаанан үөрэ-көтө үлэлиир бөлөҕү тэринэн, былааннаан, олоххо киллэрэн барбыппыт уонна бу көрөргүт курдук «Михаил Ефимович Николаев — Үйэ киһитэ» диэн ааттаах демонстрационнайплакаттарбыт күн сирин көрдүлэр. Бу плакаттарынан оҕолорбут өрөспүүбүлүкэбит туһунан өссө элбэҕи билиэхтэрэ, билиилэрин хаҥатыахтара диэн эрэнэбит. «Айар» кинигэ кыһата салгыы электроннай пособие үлэлэһиҥ диэн этии киллэрбитин үөрэ иһиттибит”, — диэн этэр лиссиэй педагог-бибилэтиэкэрэ Анна Алексеева.
Демонстрационнай кэмпилиэккэ уопсайа 24 открытка киирэр. Бу открытка хас биирдиитэ Михаил Николаев олоҕун суолун, үлэтин суолугар, оҥорбут, үлэлээбит дьыалатыгар ананар уонна сырдатар быһаарыы суруктаах. Плакаттар уруһуйдарын Аммабыт эдэр, талааннаах уола, «Айар уустар» креативнай индустрия колледжын выпускнига Андрей Григорьев оҥордо. Манна эбии «Николаев Кииниттэн» уонна лиссиэй фондатыттан хаартыскалар киирдилэр. Бу плакаттар оҕо өйүгэр түргэнник хатыыр, өйдүүр гына оҥоһуллубут, суруллубут буолан, бастакы Бэрэсидьиэн өрөспүүбүлүкэҕэ оҥорбут кылаатын, ону кытта олох туһунан толкуйдуулларыгар, өйдүүллэригэр улахан көмө матырыйаал буолар.
Сүрэхтэнии үөрүүлээх чааһыгар Амма улууһун социальнай боппуруостарга солбуйааччы Ньургуйаана Илларионова, улуустааҕы үөрэх салаатын салайааччытын солбуйааччы Татьяна Иванова, кииннэммит бибилэтиэкэ тиһигин дириэктэрэ Прокопий Прокопьев, Саха сиригэр гражданскай сэрии историятын түмэлин дириэктэрэ Байдам Айантай, оҕо искусствотын оскуолатын дириэктэрэ Любовь Заварзина кыттыыны ылан эҕэрдэлэри, санааларын тириэртилэр.
Наталия РЯЗАНСКАЯ