Бүгүн ыам ыйын 25 күнэ, Сахабыт сирин Ил Дарханын анал Ыйааҕынан Оһуокай күнүнэн биллэриллибитэ. Бу күн Амматааҕы академик Л.В.Киренскэй аатынан лиссиэй кэлэктиибэ 5-с биэрэстэҕэ «Олоҥхо дойдутун оҕотобун» диэн ыһыах ыстылар.
Ыһыаҕы аһыы сиэрин-туомун толоруллан, оҕолор, учууталлар уонна үөрэнээччилэр бүттүүн түбүрүөннээн, оһуокайы оройуттан туттулар.
Онтон салгыы кылаастарынан уонна биирдиилээн үгэс буолбут күрэхтэр ыытылыннылар. Ол курдук кылааһынан оҕолор уонна төрөппүттэр икки ардыларыгар оһуокай, сахалыы таҥас, түһүлгэни, сахалыы аһы-үөлү көрүү күрэхтэрэ, кыргыттарга «Толбоннурар УҺун Суһуох», уолаттарга «Эрчимэн Бэргэн», алын кылаастарга муҥутуур кыайыылаах мас тардыһыыта, хапсаҕай уонна алын кылаастарга хамаанданан эстафета бэрт сытыытык бардылар. Маны таһынан, быйылгы үөрэх дьылыгар Арассыыйаҕа биллэриллибит Дьиэ кэргэн сылын чэрчитинэн «Сайдам ыал» дьиэ кэргэн күрэҕэ тэрилиннэ. Бу күрэххэ кылаастар бары да олус үчүгэйдик бэлэмнэнэн кэлбиттэр, дьүүллүүр сүбэ иннигэр өбүгэ саҕаттан илдьэ сылдьар үтүө үгэстэрин сырдатан кэпсээтилэр, бары да дэгиттэр талааннаахтарын көрдөрдүлэр.
Дьиэ кэргэн күрэҕэр кыайыылаахтарынан 3 “а” кылаастан Васильевтар, орто сүһүөххэ 7 “б” кылаастан Марковтар дьиэ кэргэттэрэ буоллулар. Оһуокай күрэҕэр хаһааҥҥытааҕар да элбэх киһи кытынна. Оҕолорго aлын кылаастарга кыайыылааҕынан 3 “б” кылаастан Чирикова Айсена, 5-тэн 7-кэ диэри кылаастарга 6 “а” кылаастан Портнягина Настя буоллулар. Төрөппүттэр ортолоругар муҥутуур кыайыылаахтарынан 2 “б кылаас төрөппүтэ Ноговицына Уйгулана Федотовна уонна 7 “б” кылаастан Кириллина Анна Михайловна таҕыстылар. Оттон быыппастар былчыҥнаах уолаттар «Эрчимэн Бэргэн” күрэхтэригэр, 5 көрүҥ түмүгүнэн, 7 “б” кылаастан Ефремов Айсен кылаан кыайыылаах буолла. Кыргыттарга «Уһун суһуох» күрэххэ 4”а” кылаастан Неустроева Сахаайа, 7 “б” кылаастан Неустроева Карина толбоннурар уһун суһуохтаахтарынан ааттаннылар. Алын кылаастар ортолоругар мас тардыһыытыгар, уолаттарга 2 б” кылаастан Калачев Миша, оттон кыргыттарга 4 “б”кылаас Карманова Саина тэҥнээхтэрин булбатылар. Хапсаҕай абсолютнай күрэҕэр кыайыылаах аатын 21 кытааччыттан 4 “б” кылаастан Платонов Уруйдаан ылыан ылла. Түмүккэ ыһыах сүрүн күрэҕэр «Түһүлгэни көрүүгэ» алын кылаастарга 1-кы миэстэҕэ 3 “б “ кылаас кэлэктиибэ уонна орто сүһүөхтэргэ 7 “а” кылаастар таҕыстылар.
Бүгүҥҥү ыһыах күн лиссиэйдэргэ күн-дьыл туран биэрэн, сайыннарын үөрэ-көтө көрүстүлэр уонна уһун сынньалаҥнарыгар сүргэлэрэ көтөҕүллэн тарҕастылар.
Наталия РЯЗАНСКАЯ