Кэлэр сылбыт Кыайыы 80 сыл туолар ураты сыла буолар. Быйылгы сылы Ил Дархан Айсен Николаев Ийэ дойдуну көмүскээччилэр сылларынан биллэрдэ. Бу түгэни Амма улууһун бэтэрээннэрин Сэбиэтин бэрэссэдээтэлэ Мария Захарова олус сэргии уонна өрө көтөҕүллэн иһиттэ.
“Ил Дархаммыт Айсен Сергеевич кэлэр сылга Улуу Кыайыы 80 сыла — Арассыыйа, Сахабыт сирин олохтоохторун олоҕор ураты бэлиэ, суолталаах буоларын этэн туран, бэтэрээннэргэ оҥоһуллар көмөлөрү эттэ. Ол курдук барыларыгар өрөспүүбүлүкэ бары бэтэрээннэригэр харчынан төлөбүрү оҥоруоҕа. Аҕа дойду улуу сэриитин кыттыылаахтарыгар оҥоһуллар көмө харчы 2 мөл. солк диэри улаатыа, ону сэргэ сэрии кыттыылаахтарын огдооболоругар, Ленинград блокадатын кыттыылаахтарыгар, тыыл бэтэрээннэригэр, сэрии сылын оҕолоругар эмиэ көрүллэр көмө кээмэйэ улаатыа диэн бэлиэтээтэ. Бу күҥҥэ биһиги улууспутугар 41 тыыл бэтэрээнэ, 5 сэрии кыттыылааҕын огдообото, 213 сэрии сылын оҕото олорор. Маны сэргэ кини өрөспүүбүлүкэҕэ кырдьаҕас дьону өйөөһүҥҥэ эмиэ оҥоһуллар көмө салгыы барыа, онуоха туһуламмыт “Демография” национальнай бырайыак көдьүүһүн көрдөрбүтүн уонна 2030 сылга уһуннук олоруу орто саас 80 сааска диэри уһууругар сыал –сорук турар диэн эттэ. Айсен Сергеевич үүнэр сылы Ийэ дойдуну көмүскээччилэр сылларынан биллэрдэ. Бу Кыайыы 80 сылын кытта ыкса сибээстээх. Онон кэлэр сылга биһигини барытын улахан үлэ күүтэр”, — диэн Мария Романовна санаатын тириэртэ.
“Амма олоҕо” хаһыат