Мээндиги уонна Соморсун уолаттара Ийэ дойдуга бэриниилээх буолуу уруогар көхтөөхтүк кытыннылар

Мээндиги нэһилиэгэр «Уол оҕо эрэлбит, Эр киһи кэскилбит» диэн тэрээһин ыытылынна. Тэрээһини Мээндиги уонна Соморсун орто оскуолаларын байыаннай-патриотическай кулууптарыгар анаан-минээн Хаҥалас улууһун „Саха Боотур“ байыаннай-патриотическай кулууп киин салайааччыта Андрей Артамонов икки нэһилиэк дьаһалтатын уонна аҕаларын түмсүүтүн кытта тэрийдэ.


„Андрей Юрьевич  РФ үтүөлээх тренерэ, сахалартан бастакынан аан дойдуга каратэҕа чемпион, анал байыаннай дьайыы бэтэрээнэ буолар. Кини бэйэтин көҕүлээһининэн кэлэн уолаттарга анаан бэрт интэриэһинэй күрэхтэһиини ыытта, оҕолору кытта истиҥник кэпсэттэ. Тоҕо анаан-минээн бу икки оскуолаҕа диир буоллахха, эрдэ Соморсуҥҥа үлэлии сылдьыбыт буолан, Мээндигини уонна Соморсуну олус истиҥник саныыр. Кини маннык тэрээһиннэри  өссө Хаҥалас, Таатта улуустарыгар ыыппыт. Аны салгыы Дьокуускай куоракка тэрийэр былааннаах“, —  диэн Мээндиги нэһилиэгин баһылыга Илья Семенов сырдатар.

Оҕолор сарсыардаттан М.Н. Сибиряков аатынан Мээндиги кыраайы үөрэтэр түмэлин көрдүлэр. Кинилэргэ түмэли төрүттээччи Матрена  Захарова анал байыаннай дьайыыга аналлаах быыстапканы уонна Мээндиги оскуолатын үөрэнээччилэрэ Ильмень күөлгэ бара сылдьан көрдөөн булбут экспонаттарын кытта билиһиннэрдэ, Мээндиги баай историятын туһунан кэпсээнин бары сэҥээрэ иһиттилэр. Тэрээһин олохтоох Егор Попов алгыһынан саҕаланна.

„Тэрээһиммит үөрүүлээх арыллыытыгар аммалар бары иннибитигэр уктар биллиилээх кыраайы үөрэтээччибит, спорт бэтэрээнэ Михаил Васильевич Алексеев Скороульскай волость 385 сылыгар анаан оҕолорго Үс Хоро ууһун туһунан билиһиннэрдэ. Ол кэннэ Андрей Артамонов эҕэрдэ тыл эттэ. Кини  оскуола бибилэтиэкэтигэр, Аммаҕа Олоҥхо Ыһыаҕа буоларынан,  олоҥхо кинигэлэрин бэлэх уунна.

 

 

Маны сэргэ байыаннай- патриотическай үлэҕэ дьаныардарын иһин Мээндиги оскуолатын «Карбышевскай хамсааһын» салайааччытыгар Алексей Сергеевич  Кириллиҥҥа, оскуола дириэктэригэр Иосиф Константинович Софроновка, «Боотур уораҕайа» туристическай комплекс хаһаайыныгар Алексей Алексеевич Даниловка Саха сирин Бырабыыталыстыбатын аатыттан Махтал суруктары туттарда.  Ильмень күөлгэ көрдөөһүҥҥэ сылдьыбыт Мээндиги орто оскуолатын оҕолоро сырыыларын туһунан олус интириэһинэйдик кэпсээтилэр. Алексей Сергеевич  «Карбышевскай хамсааһын» туһунан оҕолорго, ыалдьыттарга сырдатта. Дьэ бу кэнниттэн байыаннай- спортивнай эстафета буолла. Манна оҕолор бастакы суһал медицинскай көмө оҥорорго, Калашников автомат макетын ыһарга, хомуйарга, пневматическай саанан уонна традиционнай ох саанан ытарга күрэхтэстилэр.

 

Тыҥааһыннаах күрэх түмүгүнэн Соморсун боотурдара бастакы миэстэни ыллылар. Ыалдьытымсах Мээндиги оскуолатын хамаандата иккис миэстэни ылла. Тэрээһин оһуохай күрэхтэрин хас да төгүллээх анал аат хаһаайына, Егор Попов оһуокайынан түмүктэннэ. Манна Андрей Артамонов эмиэ эрчимнээх оһуокай этэн оҕолорго хас да сыл иннигэр дьарыктаналларыгар заряд биэрдэ, сүрдэрин көтөхтө. Кини өссө оҕолорго анал байыаннай дьайыыттан анаан-минээн илдьэ кэлбит суруктары көрдөрдө уонна „Оҕолоор, эһиги эмиэ суруйуҥ. Саллаакка санаатын көтөҕөргө бэрт кыра да наада. Оччоҕо саллаат эрэлэ үрдүүр, санаата бөҕөргүүр“ диэн санаатын тиэртэ. Оҕолор  саллааттарга атын Арассыыйа регионнарын оҕолоро суруйбут суруктарын доргуччу ааҕан олус долгуйдулар. Дьэ бу курдук ийэ дойдубутугар бэриниилээх буола үүнэргэ уолаттарга аналлаах олус интэриэһинэй уонна наадалаах тэрээһин ыытыллан бары астынныбыт.

Түмүккэ Андрей Юрьевич Мээндиги уонна Соморсун нэһилиэгин оҕолорун бэс ыйын  5 -8 күннэригэр Хаҥалас улууһун Улахан Аан нэһилиэгэр Боотурдар өрөспүүбүлүкэтээҕи сүлүөттэригэр ыҥырда уонна сүлүөт балаһыанньатын туттарда. Дьиктитэ диэн Мээндигигэ уонна Уулаах Ааҥҥа тэриллибит Боотур уораҕайдарын алаастара иккиэннэрэ «Ампаардаах» диэн ааттаах. Бу мээнэҕэ буолбатах быһылаах. История кэрэһэлииринэн бүтэһик саха боотурдара баар буола сылльыбыт сирдэрэ Амма уонна Хаҥалас улуустара буолаллар. Онон билигин бу улуустартан Боотур үөрэҕэ хаттаан тиллэн, тыыллан уол оҕону дойдутун көмүскүүр кыахтаах, омугун үрдэтэр аналлаах дьиҥнээх боотурдары иитэн таһаарарга Саха сиригэр олук буолуо этэ диэн эрэнэбит. Андрей Артамонов этэринии „боотур диэн сутуругун санныгар сүгэ, батыйатын өрө көтөҕөн баран сүүрэ сылдьар киһи буолбатах. Боотур диэн бу төрөөбүт дойдутун, омугун, бүттүүн Арассыыйаны муҥура суох таптыыр, бэриниилээх киһи буолуохтаах“. Кини эт-хаан, өй-санаа, билии- көрүү өттүнэн үрдүк сайдыылаах, олордо да олоҥхолуон сөп, ойон турда да оһуокайдаан тэлээриэн сөп. Быһатын эттэххэ муҥутуур сайдыылаах эр дьону иитиэхтээхпит. Оччоҕо эрэ биһиги Сахабыт сирэ, Арассыыйа инники сайдыытыгар, кэскилигэр эрэллээх буолуохтаахпыт“, — диэн Илья Владимирович кэпсээнин түмүктээтэ.

„Амма олоҕо“ хаһыат

 

Читайте дальше