П.И. Караканов аатынан Мээндиги орто оскуолата “Вахта Памяти” диэн Бүтүн Арассыыйатааҕы көрдүүр үлэҕэ үһүс сылын кыттар. Быйыл эмиэ үлэ уруогун учуутала уонна оскуола байыаннай-патриотическай кулуубун салайааччыта Алексей Кириллин салайыытынан үөрэнээччилэр Ильмень күөл таһыгар баран көрдүүр үлэҕэ кыттыһа сылдьаллар.
“Ильмень күөлгэ охтубут саха буойуттарын хайыһар этэрээттэрин аатынан бу көрдүүр үлэҕэ Саха сирин хас да улуустарыттан баран кытта сылдьаллар. Ол курдук Чурапчыттан, Тааттаттан уонна Амматтан бары холбоһон биир этэрээт буолан ол хайыһар этэрээтин аатынан «19 биригээдэ» диэн ааттанан сылдьаллар. Оҕолор бу Ильмень күөлүн аттыгар буолбут кыргыһыы суолунан Бүтүн Арассыыйатааҕы көрдүүр үлэҕэ балаҕан ыйын 13 күнүттэн үлэлэһэ сылдьаллар.
Алтынньы 5 күнүгэр түмүктээн кэлиэхтээхтэр. Кэлэн иһэн 3 күн Санкт Петербург куоракка музейдарынан, кэрэ сирдэринэн, оскуолаларга сылдьыахтаахтар. Биһиги оҕолорбут Алексей Сергеевич салайыытынан маннык көрдүүр үлэҕэ үһүс төгүлүн бардылар. Быйыл күһүҥҥү “Вахта Памяти” диэн көрдүүр үлэҕэ Амма улууһуттан 4 оҕо уонна 1 салайааччы барбыта. Биһиги оскуолаттан 3 оҕо уонна быйыл биһиги “Эдэр Карбышевтар” хамсааһыммытыгар Сулҕаччы оскуолата кыттыспыта. Ол иһин Сулҕаччыттан 1 оҕо барсыбыта. Бастакы сырыыларыгар олох Ильмень күөл аттынан Старай Русса диэн куоракка сылдьыбыттара. Былырыын уонна быйыл Демянск куоракка, Цемена диэн дэриэбинэ аттыгар сырыттылар. Оҕолорбут хас сырыыларыттан туох эрэ түмэлгэ ууруллар күндү бэлэхтээх кэлэллэр. Бу да сырыыга оннук ситиһиилээхтик сылдьан кэлиэхтэрэ, элбэҕи кэпсиэхтэрэ диэн эрэнэбит”, — диэн Мээндиги оскуолатын дириэктэри иитэр үлэҕэ солбуйааччыта уонна сүбэһитэ Изабелла Давыдова сырдатта.
“Амма олоҕо” хаһыат