Биллиилээх суруналыыс Прокопий Караканов-Бурдук Буокай аатын сүгэр Мээндигитээҕи орто оскуолаҕа алтан чуораан чугдааран Билии күнүн үөрүүлээхтик ыыттылар. Бу күн оскуола аттыгар акация мас олортулар.
“Быйыл биһиги оскуолабытыгар аан бастаан оскуола боруогун 5 үөрэнээччи атыллаата. Кэрэ бэлиэ күн ытык мааны ыалдьытынан Прокопий Иосифович Караканов кэргэнэ Ульяна Егоровна Караканова буолла. Ульяна Егоровна эҕэрдэ, кэс тылын үөрэнээччилэргэ, оскуола бары үлэһиттэригэр тириэртэ.
Үгэс курдук ытыктыыр киһибит оскуола олбуора күөх маһынан чэлгийдин диэн бастакы кылаас оҕолоругар анаан акация маһы аҕалан туттарбытын, оҕолор төрөппүттэрин кытта тахсан үөрүүлээх быһыыга-майгыга олортулар.
Бу күн улуус дьаһалтатыттан Мээндиги нэһилиэгин куратора, улуустааҕы кииннэммит бухгалтерия салайааччыта Роман Александрович Алексеев кэлэн ыалдьыттаата, эҕэрдэтин тириэртэ. Быйыл оскуолабытыгар алта эдэр учуутал кэллэ. Ол курдук алын кылааска 3 учуутал, биир физика, биир информатика уонна биир биология-география учууталлара саҥа үөрэх дьылын саҕалаатылар. Саҥа учууталларбытыгар, оҕолорбутугар саҥа үүммүт үөрэх дьылыгар үрдүк ситиһиилэри, туйгун үөрэҕи баҕарабыт”, — диэн дириэктэри иитэр үлэҕэ солбуйааччы Изабелла Давыдова сырдатта.
«Амма олоҕо» хаһыат