П.И.Караканов аатынан Мээндигитээҕи орто оскуолатыгар икки күн устата улуустааҕы “Эдэр патриоттар” күрэхтэрэ сэргэхтик, киэҥ далааһыннаахтык буолан ааста. Слекка уопсайа алта хамаанда кэлэн күрэхтэһэн, билиилэрин хаҥатан бардылар.
Мээндиги нэһилиэгэр биир ураты суолталаах, сэргэх тэрээһин буолан ааста. Бу сыл ыам ыйыгар оскуолабыт Бүтүн Арассыыйатааҕы «Добро не уходит на каникулы» диэн волонтерскай этэрээттэр бырайыактарын күрэҕэр кыттыбыта. Манна биһиги «Эдэр патриоттар» улуустааҕы байыаннай-патриотическай слёт ыытарга диэн суруйбут бырайыакпыт кыайыылааҕынан тахсыбыта уонна 300 000 солкуобайдаах Грант ылар чиэскэ тиксибиппит. Дьэ онон бырайыакпытын олоххо киллэрэн нэһилиэкпитигэр икки күннээх слёт ыыттыбыт. Бырайыак сүрүн сыала-соруга диэн Амма улууһугар гражданскай сэрии историятын оҕолорго билиһиннэрии буолар. Слётпутугар араас нэһилиэктэртэн 6 хамаанда кыттыыны ылла. Ол курдук Амматтан В.В. Расторгуев аатынан Амма 2№-дээх оскуолата, академик Л.В. Киренскэй аатынан лиссиэй, А.Е. Кралин аатынан Абаҕа орто оскуолата, А.П. Рязанскай аатынан Соморсун орто оскуолата, И.И. Константинов-Дэлэгээт Уйбаан аатынан Сулҕаччы орто оскуолата уонна олохтоох П.И. Караканов аатынан Мээндиги оскуолата.
Бастакы күн гражданскай сэрии историятын билиһиннэрэр экскурсия ыытылынна. Экскурсияҕа оҕолору энтузиаст-краевед, Амма улууһун уонна Мээндиги нэһилиэгин бочуоттаах олохтооҕо Михаил Васильевич Алексеев салайан илдьэ сырытта. Эбиэт кэннэ олохтоох бибилиэтиэкэҕэ хамаанда аайыттан биирдии оҕо гражданскай сэрии тиэмэтигэр дакылаат аахта, хамаанданан патриотическай ырыа уонна хоһоон күрэҕэ буолла. Күммүтүн «Буойун кириэһэ» диэн документальнай киинэни көрүүнэн түмүктээтибит.
Икки күн сарсыарда хамаандалар М.Н.Сибиряков аатынан Мээндигитээҕи кыраайы үөрэтэр түмэлгэ уонна Михаил Алексеев дьиэтин олбуоругар бэйэтэ тэрийбит сайыҥҥы «Эхо гражданской войны в Амге» диэн ааттах лабораториятыгар сырыттылар. Слётпут байыаннай эстафетанан түмүктэннэ. Икки күннээх слёт түмүгүнэн кыайыылааҕынан Амматааҕы лиссиэй таҕыста. Иккис миэстэ Мээндиги орто оскуолата уонна үһүс миэстэ Абаҕа орто оскуолалара буоллулар. Тэрийээччилэр да, кыттааччылар да слёт сыалын ситистэ диэн түмүккэ кэллибит. Аммабыт кэнчээри ыччата дойдутун историятын билэр, историяны сэргиир, патриот дьон буола улааталларыгар маннык тэрээһиннэр улахан олук буолаллар. Оҕолорго бэйэлэрин дойдуларын историятын маннык салгыы билэ, үөрэтэ туралларыгар уонна кинини таптыыр дьиҥ патриот дьон буолан тахсалларыгар баҕа санаабытын эттибит.
Бырайыак олоххо киириитигэр, слёт тэрээһинигэр биир дойдулаахпыт, Саха сирин быыһыыр сулууспатын салаатын начальнига, өрөспүүбүлүкэ уопсастыбаннай палататын чилиэнэ Геннадий Алексеев, Мээндиги нэһилиэгин куратора Роман Алексеев, улуустааҕы “Юнармия” штабын начальнига, старшай лейтенант Петр Попов, улуустааҕы “Навигаторы детства” хамсааһын куратора Майя Карманова уонна «Движение Первых» хамсааһын исписэлиистэрэ Сахая Никонова уонна Мария Слепцова кыттыыны ыллылар. Биһиги кинилэргэ улахан махталбытын тириэрдэбит.
Изабелла ДАВЫДОВА, Мээндиги оскуолатын дириэктэрин иитии үлэтигэр солбуйааччыта, дириэктэри иитии уонна оҕо уопсастыбаннай холбоһуктарын кытта үлэҕэ сүбэһитэ