Амма улууһугар атырдьах ыйын 6-9 күннэригэр Дьокуускай куораттан онкологическай диспансертан быраастар кэлэн үлэлиэхтэрэ. Улуус кылаабынай бырааһа Михаил Архипов чуолкайдаабытынан, кэлбит биригээдэ олохсуйбут ыарыылаах ыарыһахтары чинчийэн көрүөҕэ.
“Дьокуускайдааҕы онкологическай диспансертан кэлэр биригээдэни бэйэбит биир дойдулаахпыт хирург-онколог Владимир Николаевич Васильев салайан илдьэ кэлэр. Манна онкогинеколог, химиотерапевт, ону сэргэ УЗИ бырааһа бааллар. Кинилэр сүрүн сыалларынан онкологическай ыарыыга кутталлаах балаһыанньаҕа сылдьар дьону көрүөхтэрэ. Билигин биһиги өр ыалдьа сылдьар, чуолкай ыарыылара быһаарыллар илик дьоннору испииһэктии сылдьабыт. Биири бэлиэтээн этэбин. Бу биригээдэ кэлэн көрүүтүгэр ким баҕарар баҕалаах киһи диэн кэлбэт. Эппитим курдук өр кэмҥэ олохсуйбут ыарыыларынан диспансернай учуокка турааччы дьон көрүүнү барыахтара. Ол курдук куртах, тыҥа, быар, бүөр ыарыылаах, уһуннук ыалдьыбыт дьону сыымайдаан ылан көрдөрүөхтээхпит. Хас биирдии испииһэккэ киирбит ыарыһаҕы өр соҕус көрөллөр. Онон ити ватсап ситиминэн тарҕаммыт биллэрии арыый атын соҕус диэххэ наада. Өссө төгүл быһааран биэрдэххэ, кэлбит быраастар бары баҕалааҕы буолбакка, киин балыыһа оҥорбут испииһэгинэн ыарыһахтары көрүөхтэрэ. Маны сэргэ кэрэ аҥардарга анаан дьахтар консультацията үлэлиэ. Манна быраастар түөстэригэр искэн баарын-суоҕун, баар буоллаҕына, эмтэнии бэрээдэгин, дьахтар ууһуур уорганнарын көрүөхтэрэ, бэрэбиэркэлиэхтэрэ. Биригээдэни сэргэ өссө өрөспүүбүлүкэ Доруобуйаҕа харыстабылын министиэристибэтин кылаабынай онколога Феодосия Гаврильевна Иванова кэлиэҕэ. Кини сүрүн сыалынан Амма улууһугар онкология ыарыыта хайдах балаһыанньаҕа турарын быһаарыы буолар. Ол түмүгүнэн атырдьах ыйын 6 күнүгэр улуус уонна нэһилиэк баһылыга кыттыылаах мунньах ыытыахтаах. Ол кэнниттэн бэйэбитигэр, медиссиинэ үлэһиттэригэр семинар оҥоруоҕа. Онно аныгы кэм ньымаларын туһанан онкологическай ыарыыны булуохха сөбүн, туохха ордук болҕомто ууруллуон наадатын уонна да атын манна туһааннаах боппуруостар көрүллүөхтэрэ”, — диэн Михаил Архипович онколог быраастар көрүүлэрин быһаарда.
“Амма олоҕо” хаһыат