Эмис нэһилиэгин биир ытыктанар ыала Ольга Саввична уонна Анатолий Алексеевич Михайловтар быйыл ыал буолан олорбуттара лоп курдук 50 сыла буолбута. Бу киһиэхэ эрэ тиксибэт үрдүкү дьолу бэлиэтээн, Михайловтар нэһилиэктэрин оҕолоругар анаан оҕо оонньуур былаһааккатын оҥорон бэлэх ууннулар.
“Учуутал идэлээх ытык дьоммут алаһа дьиэ тэриммиттэрэ үйэ аҥара буолбутун үөрүүлээхтик бэлиэтээбиттэрэ уонна дьиэ кэргэн бииргэ олорбуттарын бэлиэ күнүнэн сибээстээн нэһилиэктэригэр дьэрэкээн оҕо площадкатын бэлэх оҥордулар. Ол курдук элбэх хайысхалаах кииммит аттыгар баар спортивнай былаһааккаҕа сыһыары оҕо-аймах кэлэн оонньуур былаһааккатын тутан биэрдилэр. Маны уоллара, тарбаҕар талааннаах уус Александр Михайлов оҥордо. Манна диэн эттэххэ, спортивнай былаһааккабыт хонуута, күрүөтэ алдьанан турбута. Ону Александр эмиэ оҥорон, өрөмүөннээн биэрдэ. Оҕо былаһааккатыгар икки хачыал уонна карусель бааллар. Былаһаакка сирэ киэҥ. Сирэ-уота киэҥ, турар сирэ киин, оҕолор мусталларыгар, ооннуулларыгар табыгастаах. Михайловтар саҕалаатылар, атыттар эмиэ кыттыһан нэһилиэктэригэр спонсордаан бу былаһаакканы эбии оонньуур оборудованиелары туруоран силигэ ситэн иһиэн баҕарабыт уонна эрэнэ кэтэһэбит. Билигин манна гравий эбэтэр кумах кутуллан үрдэтиллэн наада, — диэн нэһилиэк баһылыга Прокопий Бубякин сырдатар.
Прасковья Бубякина