Бөтүҥнээҕи “Мичээр” уһуйаан повара, бэйэтин көхтөөх уопсастыбаннай үлэтинэн Прасковья Емельянова аатынан бэлиэни туппут Александра Егорова “Азия оҕолоро” норуоттар икки ардыларынааҕы спортивнай оонньууларга асчытынан үлэлии сылдьар. Александра Владимировнаҕа спорт эйгэтэ олох чугас турар. Кини төрөппүт уола, Европа чөмпүйүөнэ, быйыл Парижка ыытыллар Олимпиада кыттыыны ылар Владимир Егоров буолар.
“Мин эрдэ “Киви” хампаанньа “Азия оҕолоро” спортивнай оонньууларга үлэһит киһини көрдүүрүн туһунан биллэриитин аахпытым уонна бэйэм уһуйааҥҥа повар буолан, бэйэм сайаапкабын ыыппытым. Ону көрөн, ыҥыран кэпсэтэн баран ылбыттара. Өссө манна кэлиэм иннинэ Олоҥхо ыһыаҕар уһуйааммытыгар түспүт дэлэгээссийэлэри аһатан ас бөҕө астаабыппыт.
Манна бэс ыйын 24 күнүттэн үлэлии сылдьабын. Бары араас хайысханан сыһыарыллыбыппыт. Мин бурдук аска баарбын. Күҥҥэ 1000-лыы бэрэски, булочка, онтон да атын бурдук ас арааһын астыыбыт. Миигин кытта өссө Үөһээ Бүлүү уонна Уус Алдан улууһуттан бааллар. Барыта түөрт эбийиэгинэн аһатабыт.Ол иһигэр “Саха” НКИХ үлэһиттэрин эмиэ аһатабыт.
Маннык улахан оонньууларга кэлэн үлэлээбиппиттэн үөрэбин. Уолум спортсмен буолан, спорка чугаспын. Минньигэс ас кыайыыларга төһүү күүс буолар буоллаҕа. Онон бары сатабылбытын ууран туран үлэлиибит”, — диэн Александра Владимировна санаатын үллэһиннэ.
“Амма олоҕо” хаһыат