Биир дойдулаахпыт Аина Ильина – Какитока “Мисс новая Якутия” куонкуруска кыттан улууһун чиэһин бэрт чаҕылхайдык көмүскүү сылдьар. Кини финалга тахсарыгар дойдутун дьоно-сэргэтэ күүс-көмө, өйөбүл буолан куоластааһын үлэтэ бэрт тэрээһиннээхтик бара турар. Ол чэрчитинэн талааннаах кыыспытын өйүүр сыалтан Аммаҕа “Тутуу үлэһитэ” сынньалаҥ паркаҕа “Инструментальнай музыка кэнсиэрэ” буолан ааста.
Кэнсиэргэ Амматааҕы оҕо ускуустуба оскуолатын уһуйааччыта Робелла Артемьева кыттыыны ылла. Манна кини фортепианоҕа оҕо-аймах сөбүлээн көрөр киинэлэрин, мультиктарын ырыаларын оонньоон дьон-аймах сүргэтин көтөхтө. Бүгүҥҥү сэргэх күһүҥҥү тэрээһин оҕо-аймах саҥатынан туолла. Маны таһынан оҕолорго Аинаҕа аналлаах биктэриинэ, ырыаны, музыкальнай инструменнары таайтарар анал бириистээх оонньуулар ыытылыннылар. Тэрээһин түмүгэр тэрийээччилэр Какитокиттан анал футболканы оонньоттулар, бар дьон Аина Ильина – Какитоканы өйүүллэрин өссө төгүл дохсун ытыс тыаһынан биллэрдилэр.
