Амма улууһун үрдүнэн от хампаанньатын кэмигэр 35 мобильнай биригээдэ тэриллибитэ. Биригээдэлэр ходуһа сирдэр курааннаан, ыраах үрэхтэргэ баран оттоотулар, сорохтор күн бүгүн да оттуу сылдьаллар.
Амма улууһун тыатын хаһаайыстыбатын управлениета биэрэр субуоккатынан, балаҕан ыйын 12 күнүн туругунан мобильнай биригээдэлэр былааннарын 83, 8 бырыһыан толордулар. Ол курдук тиэрдиллибит сорук 66330 тонна эбит буоллаҕына, 5302 тонна от бэлэмнэниллиннэ. Биригээдэлэр үгүстэрэ былааннарын 100 бырыһыан толордулар. Кинилэр нэһилиэктэриттэн 60-70 км ыраах сирдэргэ оттуу сылдьаллар. Онтон сорохтор 100-тэн тахса км сиргэ эмиэ бааллар. Холобура Сатаҕай нэһилиэгиттэн Семен Анисимов баһылыктаах “Сэппэрээк” бааһынай хаһаайыстыба Соморсуҥҥа кэлэн Бодоно учаастагар 350 тонна оту оттоото. Мобильнай биригээдэлэртэн саамай элбэх былааннаах “Кэскил” ХЭТ 500 тонна оттуохтааҕын былаанын 100 бырыһыан толордо. Ол курдук кинилэр эмиэ Соморсун сиригэр Нуотара үрэҕэр баар Эбэ учаастагар тиийэн оттоотулар.
Биллэрин курдук Ил Дархан анал дьаһалынан мобильнай биригээдэлэр ыраах үрэхтэргэ тиийэн оттообут ороскуоттарыгар көмө көрүллэр. Маны сэргэ тиэйэн аҕалалларыгар эмиэ үп-харчы көрүллүүтүгэр үлэ бара турар. Бу туһунан тыа хаһаайыстыбатын управлениетын салайааччыта Ион Кононов иһитиннэрэр.
“Амма олоҕо” хаһыат