Балаҕан ыйын 5 күнүн туругунан мобильнай биригээдэлэр күүстэринэн 5154 тонна от оттонно. Бу былаантан 81, 4 бырыһыан.
Амма улууһун кылаабынай агронома Николай Гаврильев бэлиэтээбитинэн тэриллибит 35 биригээдэттэн билигин аҕыйах биригээдэ хаалан оттуу сылдьар.
“Ардахтар мэһэйдээннэр күттүөннээх охсуу тахса илик. Мобильнай биригээдэлэр ыраах үрэхтэргэ оттуу сылдьаллар. Ол курдук күн бүгүн “Болугур” ТХПК-тан Искэхтээххэ, Ходуһалаахха, ону сэргэ Алексей Петрович Ефремов бааһынай хаһаайыстыбата Хатыҥ Үрэххэ, Михаил Михайлович Филиппов Сыыкырга, “Бөтүҥ” ТХПК-тан Хотуйаҕа үрэх баһыгар уонна манна өссө Юрий Вахтангович Чиквинидзе бааһынай хаһаайыстыбата оттуу сылдьар. Эмиэ Бөтүҥтэн Полина Петровна Иванова “Чолбон” бааһынай хаһаайыстыбата Нуотара үрэҕэр Мохулу учаастагар, Амма Наахараттан Гаврил Алексеевич Илларионов бааһынай хаһаайыстыбата Үөттээх учаастагар Таҥхаҕа, Соморсунтан “Үрүйэ” хаһаайыстыбата Нуотараҕа, Алексей Терентьев Бэрэ үрэҕэр уонна Сатаҕайтан Лукин аатынан хаһаайыстыба Дьагадьыма учаастагар оттуу сылдьаллар. Мобильнай биригээдэлэр быйылгы сезоҥҥа 6330 тонна оту оттуохтаахтар. Билигин кинилэр күүстэринэн 5154 тонна оттонно. Онон былааннарын 81,4 бырыһыаҥҥа тириэрдэн куһаҕана суох көрдөрүүлээхтэр. Үгүс биригээдэлэр былааннарын сүүс бырыһыан толордулар”, — диэн этэр Николай Степанович.
“Амма олоҕо” хаһыат