Амма улууһун дэлэгээссийэтэ Нам улууһугар тиийэн «Үлэ аргыстаах эдэр саас» бырайыагын билиһиннэрдэ. Дэлэгээссийэни улуус баһылыгын социальнай боппуруостарга солбуйааччы Ньургуйаана Илларионова салайда.
«Биһиги улуус «Үлэ аргыстаах эдэр саас» диэн Алтан нэһилиэгин көхтөөх далбардара Наталья Борисова уонна Римма Дьячковская саҕалаабыт бырайыактара улаатан, кэҥээн өрөспүүбүлүкэҕэ тарҕанна. Бу бырайыагы, билэргит курдук, «Арассыыйа ийэлэрэ» уопсастыбаннай хамсааһын өйөөн, тэҥҥэ үлэлэһэн, ону сэргэ кииннэммит бибилэтиэкэ эмиэ тэбис тэҥҥэ үлэлэһэн, күн бүгүн улуустарга киэҥник билиннэ.
Бу иннинэ аан бастаан нэһилиэктэрбитинэн сылдьан баран, аны улуустарга билиһиннэрэбит. Ол курдук, Таатта улууһугар бара сылдьыбыппыт. Аны бу Нам улууһугар эмиэ халыҥ дэлэгээссийэнэн кэлэн бырайыактарбытын, хайдах-туох үлэлии сылдьарбытын кэпсээтибит. Намнар олус астыннылар, сэргээтилэр. Улуус дьаһалтата сырыыбыт туһунан бэйэтин телеграмыгар таһаарда»,- диэн Ньургуйаана Ивановна сырдатта.
«Амма олоҕо» хаһыат.