Нэһилиэк холобурга сылдьар аҕата Альберт Соловьев

Бүгүн Сахабыт өрөспүүбүлүкэбитигэр Аҕа күнэ бэлиэтэнэр. Бу күнү аҕа оруолун өрө тутар, үрдэтэр инниттэн бастакы Бэрэсидьиэммит Михаил Николаев анал Ыйааҕынан олохтоммута быйыл 25 сылыгар барда. Эмис нэһилиэгэр биир холобурга сылдьар аҕанан ОДьКХ үлэһитэ Альберт Соловьев буолар.


Альберт Спиридонович Соловьев үс оҕо тапталлаах аҕата, икки сиэн амарах эһэтэ. Кини олох эдэр эрдэҕиттэн олус көхтөөх. Онон ыал да буолан баран, туох баар ыытыллар тэрээһиҥҥэ кыттан, нэhилиэгин чиэһин спорт араас көрүҥнэригэр элбэхтик көмүскээбитэ. Кини сөбүлээн кыттар көрүҥнэринэн волейбол, бильярд, ох саа, спортинг уонна да атыттар. Аны култуурунай да тэрээһиннэргэ,туох баар субуотунньуктарга биир тутаах киһи буолар.  Нэһилиэктэрин иһинэн туруоруллар испиктээкиллэр биир саамай тутаах оруолларга оонньуур.

Соловьевтар оҕолорун кыра эрдэхтэриттэн бэйэни кыанар, төрүт үгэстэри иҥэрэн үөрэтэн иитэ илдьэ сылдьар нэһилиэк биир бастыҥ дьиэ кэргэнэ. Альберт Спиридонович уолаттарын үлэҕэ, булка, нэhилиэккэ ыытыллар тэрээhиннэргэ тэҥҥэ илдьэ сылдьан кытыннарар. Улахан уолунаан Айталлыын улууска хас да төгүл “Аҕа уолунаан” күрэх кыайыылаахтара, призердара. 2014 өрөспүүбүлүкэҕэ бастаан тураллар.

Кыра уола Арылханныын 4-с кылаастан улуус күрэхтэригэр ситиһиилээхтик кыттан нэһилиэк чиэһин көмүскээн кэллилэр. Альберт кэргэнинээн Лилия Константиновналыын оҕолоругар, сиэннэригэр ынах сүөһү, оҕуруот үлэлэригэр, булка-аска, араас үлэҕэ бииргэ илдьэ сылдьан холобур буолаллар.

Альберт Спиридонович бэҕэһээ ыытыллыбыт улуустааҕы байанайдаах булчут Гаврил Александров бирииһигэр эмиэ кыайыылааҕынан тахсан нэһилиэктэрин аатын өрө туттулар.

“Оҕону бэйэни кытта илдьэ сылдьан үөрэтэр ордук. Уолаттары кыра эрдэхтэриттэн бэйэбин кытта дьиэ ис-тас үлэтигэр барытыгар үөрэтэбин. Онон ыытыллар күрэхтэһиилэргэ да кыттарга үчүгэй буолар. Аҕа киһи хаһан баҕарар оҕолоругар бэйэтин үлэтинэн, дьоҥҥо сыһыанынан, үлэҕэ сыһыанынан холобур буолуохтаах ”,- диэн этэр Альберт Спиридонович.

“Амма олоҕо” хаһыат

Читайте дальше