Бүгүн — дьиэ кэргэн, таптал уонна эрэллээх буолуу күнэ. Амма Наахара нэһилиэгин биир бастыҥ ыалларынан Людмила Никаноровна, Михаил Афанасьевич Ксенофонтовтар буолаллар. Иллээх дьиэ кэргэн сүбэлэрин холбоон бииргэ олорбуттара быйыл оруобуна 55 сыл буолла.
Людмила Никаноровна уонна Михаил Афанасьевич ыал буолаат киһи кута-сүрэ тохтуур дууһатын сылаанньытар, эйэлээх эйгэлээх, эйэҕэс сыһыаннаах, нус бааччы олохтоох, кэнэҕэски кэскили түстүүр дьиэ-кэргэн уйатын олохтообуттара.
Ыал аҕата Михаил Ксенофонтович 40-н тахса сыл сварщигынан үлэлээбитэ, эдэр сааһыттан барыга бастыҥ уолчаан олус көхтөөҕө, спорсмент бэрдэ этэ. Кини эдэр сылдьан Николай Захаровтыын- Сахааччалыын Амма оройуонун сүүмэрдиир хамаандатыгар киирэннэр бииргэ волейболга күрэхтэһэн кыайан турардаахпын диэн үөрэн, киэҥ туттан сиэннэригэр сэһэргиирин истэн турабын. Михаил Ксенофонтович олох-дьаһах коммунальнай хаһаайыстыбатын эйгэтигэр үлэлээн, СӨ ОДьКХ бэтэрээнэ. Онтон Людмила Никаноровна улахан дьиэ кэргэн бастакы оҕото буолар. Онон бырааттарын, балыстарын көрөн олус дьаһаллаах, үтүө үлэһит буола үүммүтэ. Үлэҕэ эриллибит кыыс бастаан зверофермаҕа үлэлээбитэ. Онтон нэһилиэк орто оскуолатыгар бибилэтиэкэрдээбитэ. Сытыы-хотуу кыысчааны 1992 сыллаахха нэһилиэк Сэбиэтин сэкэрэтээринэн талбыттара. Онтон баһылык солбуйааччытынан 15 сыл үлэлиир. Ити курдук дьиэ кэргэн далбар хотуна, амарах ийэтэ нэһилиэк сайдарыгар элбэх күүһүн, сатабылын биэрбитэ. Людмила Никаноровна нэһилиэккэ олус көхтөөх киһинэн биллэр. Кини «Чэлгийээнэ» эбэлэр түмсүүлэрин тэрийбитэ. Үһүс көлүөнэ оскуолатын көхтөөх кыттааччыта, хаалыктаах хаамыынан дьарыктанар, ырыаһыт мааныта, олохтоох коллекционердар түмсүүлэрин көхтөөх кыттааччыта. Ону таһынан эмтээх оту хомуйар, баайар, оҕуруот бөҕө олордон сиэннэрин сибиэһэй аһынан күндүлүүр. Людмила Никаноровна өр сыллаах үлэтэ сыаналанан СӨ Гражданскай килбиэн, СӨ Гражданскай көҕүлээһиннэрин, Амма киэн туттуута бэлиэлэр хаһаайкалара буолар. Ксенофонтовтар сэттэ оҕолонон, биир суолунан үктэнэн, сарын-сарыннарыттан өйөнсөн оҕону иитиигэ нэһилиэк, улуус биир ытыктанар ыаллара диэн киэн тутта ааттыыбыт.
Иккиэн Амма Наахара нэһилиэгин Бочуоттаах олохтоохторо. Элбэх сиэн, хос сиэн үөрэн чаҕааралларын истибит дьоллоох дьоммут үлэһит үтүөтэ гынан оҕолорун ииттилэр. Ол курдук улаханнара Римма омук тылын учуутала, Алтан орто оскуолатын үөрэх чааһыгар дириэктэр солбуйааччытынан үлэлиир, СӨ Үөрэхтээһинин туйгуна. Иккистэрэ Валентина Дьокуускай куоракка Оҕо киинин сүрүннүүр бибилэтиэкэрэ, СӨ култууратын туйгуна, үһүс кыыс Александра СӨ “Мин биисинэһим” киинин Амма улууһугар салаатын салайааччыта, кыра кыыс Анна «Колос» ХЭТ бухгалтера. Онтон улахан уол Владислав Аммаҕа ОДьХ оператора, орто уол Станислав омук тыла үөрэхтээх, естественнай наука доктора, Айова штатын университетыгар устудьуоннары үөрэтэр преподаватель буолар. Кыра уол Егор волейбол доҕордоох, сымса туттуулаах спортсмен этэ. Кини физкультура учуутала, «СӨ физическай култууратыгар кылаатын иһин» бэлиэ хаһаайына этэ…
Оҕолор сөбүлүүр идэлэрин талалларыгар төрөппүттэр болҕомто ууран билигин бары үөрэхтээх, үлэлээх саха бастыҥ ыалын ийэлэрэ, аҕалара. Оҕолор төрөппүт холобурунан бэйэлэрин оҕолорун, сиэннэрин көрөллөр-истэллэр. Бэлиэ күннээх ыалбытын Людмила, Михаил Ксенофонтовтары нэһилиэкпит аҕа баһылыга Захар Александров, баһылык солбуйааччыта Сахаяна Михайлова Аан дойдуга Дьиэ кэргэн күнүнэн эҕэрдэлээтилэр.
Нэһилиэкпит бастыҥ ыалыгар “алаһа дьиэҕитигэр ил-эйэ эрэ уйаланнын! Сайдыы суолугар ииппит-такайбыт оҕолоргут, сиэннэргит инники диэки иннибэккэ айаннаатыннар! Баҕа санааларгыт барыта ситиһиини сиэтиилээх, күн сардаҥатыттан күөдьүйэн сылаас тыыннаах буоллуннар! Бары этэҥҥэ буолун!» — диэн ыра санаабытын тиэрдэбит.
Ирина КОРЯКИНА -ОЛЕСОВА