Бүгүн тохсунньу 19 күнүгэр Бөтүҥ орто оскуолатын 15 сыл устата таһаарыылаахтык сайыннарбыт, нэһилиэккэ үөрэх сайдыытын түстэспит, нэһилиэк бочуоттаах олохтооҕо, педагогическай үлэ уонна тыыл бэтэрээнэ Иван Дьячковскай төрөөбүтэ 95 сылын туолла.
Иван Михайлович Дьячковскай 1930 сыллаахха тохсунньу ый 19 күнүгэр Алтан нэһилиэгэр төрөөбүтэ. Кини І-кы кылааска 1937 сыллаахха І Холгума начальнай оскуолатыгар үөрэнэ киирбитэ. Онтон 1946 сыллаахха .Алтан сэттэ кылаастаах оскуолатын ситиһиилээхтик бүтэрэн баран, икки сыл холкуоска, 1 сыл нэһилиэк ааҕар балаҕаныгар үлэлээбитэ. 1947 сыл комсомолга, онтон 1957 сыллаахха ССКП чилиэнинэн киирбитэ. 1950 с. холкуостары салайар кадрдары бэлэмниир оскуоланы бүтэрэн 1952 сылга диэри агрономунан, онтон 1953-1958 сылларга Мэҥэ Хаҥалас улууһун Александр Матросов аатынан колхоһугар бырабылыанньа солбуйааччы бэрэссэдээтэлинэн, Мэҥэ Хаҥалас комсомолун оройуоннааҕы кэмитиэтин инструкторынан үлэлээбитэ. 1958 сыллаахха Амма оройуонугар Сатаҕай нэһилиэгэр көһөн кэлэн, 1961 сылга диэри биригэдьиирдиир. Онтон 1961-1965 сылларга ССКП райкомун инструкторынан ананан үлэлээбитэ. Сатабыллаах салайааччыны 1965 с. Бөтүҥ нэһилиэгэр оскуола дириэктэринэн аныыллар. Үлэлии сылдьан кэтэхтэн СГУ историческай факультетын үөрэнэн бүтэрбитэ. Иван Михайлович оскуоланы 15 сыл устата үрдүк таһаарыылаахтык салайбыта.
«Иван Михайлович Бөтүҥҥэ оскуола 8 кылаастаах эрдэҕинэ 1965 с. дириэктэринэн ананан кэлбитэ. Ол бириэмэҕа түөрт сиринэн көһө сылдьан үөрэнэрбит (эргэ оскуола, кулууп, интернат, холкуос хонтуоратыгар биир хоһу ылан). Үлэлииргэ, үөрэнэргэ усулуобуйа суоҕа. Иван Михайлович кэлээт да саҥа оскуола тутуутун туруорсан барбыта. Элбэхтик кэлэн-баран, кэпсэтиһэн саҥа оскуола 1972 с. үлэҕэ киирбитэ. Саҥа оскуоланы туттаран баран, аны оскуола материальнай базатын хаҥатыыга үлэлэспитэ. Уруокка туһаныллар предметтэринэн көрдөрөн пособиелары, араас техническэй средстволары, кыргыттар үлэ уруогар иистэнэллэригэр анаан 10-тан тахса массыынаны кэпсэтиһэн булбута. Кини дириэктэр быһыытынан ирдэбиллээх, үлэтигэр үрдүк эппиэтинэстээх этэ. Учууталлар үлэлиир, олорор усулуобуйаларын бастатан туран хааччыйара. Ол курдук, уокка оттор мас дьиэбит таһыгар сүөкэммит буолара. Онон учууталлар оттук мас туһунан кыһаллыбат буолаллара. Оччотооҕу кэмҥэ оскуола бэйэтэ туһунан хочуолунайдаах буолан, мэлдьи хачыгаардар үлэлэрин, оскуола температуратын бэрэбиэркэлээн хонтуруолга тутара. Оскуолабыт мэлдьи сылаас, ыраас буоларын кытаанахтык ирдиирэ. Иван Михайлович үлэлиир кэмигэр оскуола материальнай базатын биллэрдик хаҥаппыта. Ол курдук учууталлар олорор икки этээстээх уонна 4 квартиралаах дьиэлэрэ тутуллубуттара. Иван Михайлович үлэһиттэригэр ирдэбиллээх эрэ буолбакка, дьон кыһалҕатын өйдүүр, сыаналыыр, кыһаллар этэ. Кини салайааччы быһыытынан үрдүк культуралаах, олус интеллигентнэй киһи этэ. Педколлектив сүрдээх түмсүүлээҕэ, иллээҕэ. Үлэлэригэр ис дууһаларын ууран, үтүө суобастаахтык үлэлииллэрэ. Ол барыта дириэктэр сатабыллаах дьаһала буоллаҕа. Иван Михайлович Бөтүҥҥэ көһөн кэлэн олохсуйан, оскуола дириэктэринэн 15 сыл, онтон олохтоох Сэбиэт бэрэссэдээтэлинэн уонна араас таһымнаах салайар үлэлэргэ үлэлээн нэһилиэнньэ ортотугар олус убаастанар, ытыктанар салайааччы. Кини үөрэх сайдыытыгар улахан кылаатын киллэрбит дириэктэр быһыытынан сыаналанар. Кырдьаҕас көлүөнэ дьон билиҥҥэ диэри уос номоҕо оҥостор үтүө киһилэрэ», — диэн педагогическай үлэ бэтэрээнэ Мария Семеновна Афанасьева оскуола историятын кэпсиир кинигэҕэ бэйэтин ахтыытыгар суруйан хаалларбыта.
Амма улууһугар үөрэх сайдыытын түстэспит үтүө киһи туһунан сиһилии “Амма олоҕо” хаһыакка ааҕаарын.
“Амма олоҕо” хаһыат