“Фаворит” бильярд кулуубугар нэһилиэктэр икки ардыларыгар ыытыллар спартакиада чэрчитинэн, бильярдка күрэхтэһии буолла. Улуус уон түөрт нэһилиэгиттэн Эмис уонна Сулҕаччы нэһилиэгэ хамаанда туруорбата. Уоннааҕылар бары ох курдук оҥостон, кустук курдук куоһанан кэлэн сытыы киирсиилэри көрдөрдүлэр.
Күрэх аанын тэлэччи аһар үөрүүлээх түгэҥҥэ “Фаворит” кулууп хаһаайына Григорий Аммосов уонна Спорт управлениетын салайаачы Дмитрий Наумов кыттааччыларга дьолуолаах оонньууну баҕаран туран, “ким кыахтаах кыайдын, ким бэлэмнээх өрөгөйдөөтүн” диэн алгыстарын анаатылар. Күрэх түһүлгэтин бастакы пирамидатын алдьатар чиэһи аҕа саастаах кыттааччыга Чапчылҕантан Зоя Заборовскаяҕа биэрдилэр. Дохсун ытыс тыаһынан доҕуһуолланан бастакы саар сэниэлээхтик туура охсуллан күрэх саҕаланна.
Күн уота өспүтүнэн арҕаа саҕахха санньыйыар диэри аҕыс хамаанда сыыйыллан туораата. Лоп курдук киэһэ тоҕус чааска финал иннинээҕи киирсиигэ Өнньүөс, Сатаҕай, Амма уонна Алтан хамаандата аһыыр санааны антах анньан, үссэнэ түһэр баҕаны киэр илгэн туран күөн көрүстүлэр. Түлүк түүн үүнэн, ый сыыллан тахсан оруобуна орой үрдүгэр тыгарын саҕана оонньуу бүттэ. Абытайдаах тыҥааһыннаах оонньуу кэннэ Сатаҕай ыкса ыалын Алтаны сабырыйан үһүс бочуоттаах миэстэҕэ таҕыста. Сатаҕайдар күннэрэ күөрэйэн үөрэ-көтө дойдуларын диэки ырыа-тойук аргыстаах айанаан куугуната турдулар. Алтаннар хоттордубут диэн хом санааны хоннорбокко, кыайтардыбыт диэн кыһыы-аба тылын ыһыктыбакка “Дьэ, эбитэкэйэ, эһиил буоллун, харда биэрэр курдук дьаһаныахпыт, хоруй уунар курдук оҥостуохпут”, — диэн бөҕө санааларын сүкпүтүнэн эмиэ өтөхтөрүн суолун быстылар.
Онтон туран, бастакы миэстэни былдьаһан Амма ааттаахтара икки Өнньүөс өрүөллэрэ икки оонньуу киэнэ улаханыгар оройдорунан умустулар. Үс күөс быстыҥа күөрэйэ-күөрэйэ тимирдилэр, тимирэ-тимирэ күөрэйдилэр. Сытыы киирсии түмүгэр Амма хамаандата дубук туттан хотторон кэбистэ. Өнньүөстэр өрөгөйдүүр үөгүлэрэ үс үрэх үрдүнэн иһилиннэ, айхаллыыр саҥалара аҕыс алааска сатараата.
Бастаабыт хамаанда састаабыгар Алексей Пахомов, Туйаара Смирникова уонна Иван Пахомов оонньоотулар. Иккис миэстэҕэ тиксибит Амма хамаандатыгар Константин Слепцов, Аграфена Трифонова уонна Валерий Кириллин киирдилэр. Үһүс миэстэ буолбут Сатаҕай хамаандатыгар Василий Шишигин, Дария Стручкова уонна Егор Андреев бааллара.
Бильярд оонньуутугар сүрэхтиин-быардыын ылларбыт бэтэрээн оонньооччу Игнатий Гаврильев күрэх хара саҕаланыаҕыттан ханна да аралдьыйбакка, туохха да улдьаарбакка дьүүллүүр сүбэҕэ үлэлээтэ. Кини киһи ким хайа иннинэ эрдэ кэлэн баран бүтэһик хаалан кулууп аанын хатаат дьиэтин диэки хоочугуруу турда.
Олег ЕГОРОВ.