Сылтан ордук кэм ааста – Амма биир чулуу уола Николай Архипов олохтон туораабыта. Кини дойдутун туһугар сүрэхтиин-быардыын аҕалыы кыһаллар майгытын, чэчирии сайдарын иһин харса суох үлэлээбит сыратын-сылбатын дьон-сэргэ билигин даҕаны саныыр, сыаналыыр, ытыктыыр. Кини үтүө аатын – үтүмэн элбэх сүҥкэн үлэнэн уонна Амма Эбэ курдук холку, истиҥ майгытынан оҥостубута. Аҕа баһылык быһыытынан аммалары эдэрдиин-эмэнниин чахчы бииргэ түмэр дьоҕурун дьон умнубат, умнуо да суоҕа. Дьиҥнээх патриот киһи – кини этэ диэн уос номоҕор кубулуйан үйэлэри уҥуордуур мэҥэ аат иҥтэ Николай Архиповка.
Ытыктыыр аҕа баһылыкпытын бүгүн даҕаны нөрүйэн туран өйдүүр-саныыр, сүгүрүйэр санаалаахпытын биллэрэн Солобуода күнүгэр кини аатын үйэтитэр кэккэ тэрээһиннэр ыытылыннылар. Ол курдук, Албат аат болуоссатыттан саҕаламмыт “Нация Кроһа-2023” хомуур сүүрүүнү сэргэ Николай Архипов сырдык кэриэһигэр бэлэсипиэтинэн куоталаһыы буолла. Кыралыын-улаханныын икки сүүстэн тахса бэлэсипиэттээх киһи халыҥ халҕаһата «Олимп» стадиоҥҥа тоҕу кутуллан тиийэн араас дистанцияҕа күрэхтэстилэр.
Күрэх аанын аһар үөрүүлээх түгэҥҥэ Николай Архипович кэргэнэ Оксана Ивановна Архипова күрэхтэһиини тэрийбиттэргэ – улуус дьаһалтатыгар уонна спорт управлениетыгар дириҥ махталын биллэрдэ.
«Николай Архипович эдэр эрдэҕиттэн спортка чугас этэ. Оҕо сааһыттан маҥнай тустуунан, онтон футболунан уонна мас тардыһыынан сөбүлээн дьарыктаммыта. Онтон 2016 сыллаахха Аммаҕа кэлэн баран бэлэсипиэти сөбүлээн тэбэр буолбута. Кини сарсыарда аайы Амма устун сылдьар, Эбэҕэ киирэр этэ. Ити үгэһин олох көтүппэт идэлээҕэ», — диэн Николай Архипович бэлэсипиэти таптаан тэбэрин туһунан Оксана Ивановна ахтан ааста.
Күрэхтэһиигэ дистанция ахсын сүүрбэччэлии киһи кытынна. Биэтэккэ кэлбит кыайыылаахтары билиһиннэрдэххэ маннык:
1200 миэтэрэҕэ 1-4 кылаастарга:
1 м. – Леонид Захаров,
2 м. – Айсан Иванов,
3м. – Валерий Борисов.
2000 миэтэрэҕэ 5-8 кылаастарга:
1 м. – Аэлита Петрова, Руслан Трифонов,
2 м. – Эвелина Андреева, Роман Филиппов,
3 м. Саяна Аргунова, Руслан Гаврильев.
4000 миэтэрэҕэ 9-11 кылаастарга:
1 м. – Алексей Гаврильев,
2 м. – Владислав Дьячковский,
3 м. – Петр Слепцов.
4000 миэтэрэҕэ эр дьоҥҥо уонна дьахталларга:
1 м. – Семен Килбясов, Айталина Борисова,
2 м. – Афанасий Владимиров, Надежда Филиппова,
3 м. – Кирилл Павлов, Айыына Петрова.
Ити курдук Николай Архипович сырдык аатын үйэтитэр бастакы тэрээһин сүүһүнэн дьону түмтэ. Мантан салгыы тэрээһин үгэскэ кубулуйан сыллата ыытылларыгар, итиэннэ далааһына кэҥээн улахан күрэх быһыытынан барар буолуоҕар эрэнэ хаалабыт. Оччоҕо Амма чулуу уола Николай Архипов үтүө аата үйэлэргэ өйтөн сүтүө, өлбөөдүйүө суоҕа.
Олег ЕГОРОВ