Амматааҕы ойуур хаһаайыстыбатын салайааччыта Николай Иванов иһитиннэрбитинэн, от ыйын 12 күнүн туругунан бары тахсыбыт баһаардар умуоруллан, улуус территориятыгар ойуур баһаара суох.
“Баһаартан сэрэхтээх буолуу сезона саҕаланыаҕыттан улууспутугар уопсайа 15 баһаар регистрацияланна. Манна уопсайа 2887, 3 га сир умайда. Баһаары умуруорууга 488 киһи үлэлээтэ. Күн бүгүҥҥү туругунан улууска ойуур баһаара бэлиэтэнэ илик. Тахсыбыт баһаардар бары умуруоруллубуттара. Билигин бу кэлэр буруо Өлүөхүмэ, Алдан, Амурскай уобаласка тахса турар улахан баһаардарыттан тыал хайысхатынан кэлэр. Билэргит курдук бэс ыйын 26 күнүгэр Ил Дархан Айсен Николаев анал Ыйааҕынан өрөспүүбүлүкэҕэ ураты баһаартан сэрэхтээх буолуу эрэсиимэ биллэриллэн турар. Сир аһын хомуйуу саҕаланна. Онон дьон-сэргэ тыаҕа сылдьаргытыгар уоту туттартан сэрэхтээх буоларгытыгар ыҥырабыт. Биир сыыһа хамсаныыттан, сэрэҕэ суохтан улахан уот туруон сөп”, – диэн этэр Николай Григорьевич.
“Амма олоҕо” хаһыат