Бүгүн, балаҕан ыйын 1 күнүгэр, дойдубут үрдүнэн Билии күнэ бэлиэтэнэр. Сайыҥҥы сынньалаҥ кэнниттэн чуумпуран турбут оскуола оҕо саҥатынан туолуо. Бу күн ордук оскуола боруогун аан бастаан атыллыыр, үөрэх-билии аартыгын дабайар суоллара арыллар бастакы кылаас үөрэнээччилэригэр олус долгутуулаах. «Ол гынан баран бу күн учууталларга, үөрэнээччилэргэ, үөрэх бары эйгэтин үлэһиттэригэр барыларыгар долгутуулаах» диэн Амма улууһун үөрэҕин управлениетын салайааччыта Николай Ларионов этэр уонна Билии күнүнэн бэйэтин эҕэрдэтин тириэрдэр.
“Эмиэ биир саҥа үөрэх дьыла саҕаланна. Сарсын улуус бары оскуолалара ааннарын тэлэччи аһан бэйэлэрин үөрэнээччилэрин үөрэ-көтө көрсүөхтэрэ. Быйыл аан бастакыларын үөрэх-билии аартыгын дабайа 236 үөрэнээччи кэлэн долгуйа оскуола боруогун атыллыахтара. Кинилэри бастакы учууталлара “А” буукубаттан саҕалаан ааҕарга-суруйарга үөрэтиэхтэрэ. Онтон ааспыт үөрэх сылын түмүгүнэн оскуоланы 169 үөрэнээччи бүтэрэн араас үөрэх кыһаларыгар киирэн эмиэ үөрэх дьылын саҕалыахтара. Ол курдук 70 оҕо үрдүк үөрэх кыһаларыгар, 91 оҕо орто үөрэхтэргэ киирдилэр. Биһиги кинилэргэ сөбүлүүр идэлэригэр ситиһиилээхтик үөрэнэн дойдуларыгар туһалаах дьон буолан тахсалларыгар баҕарабыт.
Быйылгы үөрэх дьылыгар үөрэх систиэмэтигэр элбэх уларыйыылар киирдилэр. Баар предметтэри таһынан билиҥҥи кэм ирдэбилэ ирдиир предметтэрэ, ону сэргэ урут оҕолору үлэҕэ уһуйар үлэ уруога эмиэ баар буолла. Киирбит саҥа уларыйыылар биһиги улууспут оскуолаларыгар ситиһиилээхтик олоххо киириэхтэрэ диэн эрэнэбин.
Сарсын алтан чуораан чугдааран саҥа үөрэх дьыла саҕаламмытын биллэриэ. Убаастабыллаах учууталлары, иитээччилэри уонна үөрэнээччилэри бука барыгытын Билии күнүнэн итии истиҥ эҕэрдэбин тириэрдэбин. Айымньылаах үлэни, туйгун үөрэҕи уонна чэгиэн доруобуйаны баҕарабын”, — диэн Николай Александрович бэйэтин эҕэрдэтин тириэртэ.
“Амма олоҕо” хаһыат