Амма күнүгэр тэриллибит уруһуй быыстапкатыгар Сахабыт сирин биллэр худуоһунньуктара талааннаах биир дойдулаахпыт Николай Рязанскай уонна Чурапчы улууһуттан төрүттээх Иннокентий Корякин биллэр хартыыналарын репродукциялара атыыга турдулар.
Арассыыйа уонна Саха сирин худуоһунньуктарын сойууһун чилиэнэ Николай Рязанскай Солобуода күнүн бэлиэтиир бырааһынньыкка ыҥырыллан, анаан-минээн Сулҕаччыттан кэлбит. Кини айар үлэтин сэҥээрээччилэр Николай Николаевич тулатыттан биир кэм арахпаттар. Буолумна даҕаны, сөбүлүүр уруһуйдарын атыылаһар, ааптары кытта сирэй көрсөн кэпсэтэр хас күн аайы тосхойбот түгэн.
Амма күнүгэр дьон сэҥээрэр, атыыга барар уруһуйдарбын аҕаллым. Хас да хартыынабын атыыластылар. Холобура, “Мандар Уус түүлэ”хартыынабын Баайаҕаҕа тиийэ сылдьан Борис Федорович Неустроев кэпсии олордоҕуна тута өйбөр оҥорон көрбүтүм, хайаан да уруһуйдуур эбиппин дии санаабытым. Сүрдээх үчүгэйдик кэпсиир. Айыы Далбар Хотуну Эмискэ көрбүтүн эмиэ уруһуйдуур баҕалаахпын.
Айар үлэбин бастаан оҕолортон саҕалаабытым, оҕо тиэмэтиттэн, аны билигин оҕонньорунан бүтээри гынным быһылаах. Холобура, “Сайылыкка көһүү” диэн уруһуйбар Тураайы диэн улааппыт сайылыкпын ойуулаабытым. Бу чуулааҥҥа биһиги олорор этибит. Бу ийэм олорор, ити балтым турар. Манна балтым алталаах, сэттэлээх буоллаҕына мин 16-лаах, 17-лээх эбиппин. Иитэр-үөрэтэр суолталаах. Оччотооҕу кэм иһитэ-хомуоһа, туттар тэриллэрэ бааллар. Бу үлэ бөҕөтүн үлэлээбит дьон. Дайаарка үлэтэ былыр ыарахан бөҕө буоллаҕа. Биир да өрөбүлэ, уоппуската суох үлэлииллэр. Тиһэҕэр тиийэн кинилэр ааттара ааттаммат… Ол иһин бу хартыынабын кинилэр килбиэннээх үлэлэригэр пааматынньык курдук махтанан уруһуйдаабытым. Ол курдук 70-с сыллардааҕы “Сулҕаччы сылгыһыттара” хартыынабын оҥорбутум. Киһини өйдүүр буолуохпуттан уруһуйдуубун.
Оҕо садыгар сылдьан баспытааталбын кытта кыыһырсар этим ээ. Раскраска диэн баар, ону кырааскалаабаккабын айдаан бөҕө буолар. Бэйэм уруһуйдуохпун баҕарарбын, кинилэр бэлэм линияларын сүрэҕим олох ылыммат, — диэн Николай Рязанскай айар үлэтиттэн сырдатта.
Вера ИВАНОВА