Россия бэрэсидьиэнэ Владимир Путин Федеральнай мунньахха туһаайыытын Амма оройуонун бары нэһилиэктэрин ыаллара кэтэһэн көрдүлэр, иһиттилэр. Соморсун олохтооҕо, үлэ бэтэрээнэ Петр Саввин регионнар общественнай тырааныспарынан хааччыллалларыгар эбии 150 млрд солк. көрүллэрин улаханнык биһирээтэ. Бу боппуруоһу кини ааспыт нэдиэлэҕэ эрэ өрөспүүбүлүкэ Бырабыыталыстыбатын мунньаҕар туруорбута.
-Маннык үтүмэн өйөбүл көрүллэр буолбутунан Амма улууһугар автобус кэлэр түгэнигэр биир улахан кыһалҕабыт — нэһилиэктэр олохтоохторун киин куоракка тиэйии быһаарыллыа этэ. Билигин барыта чааһынай массыыналар сылдьар буоланнар кыра хамнастаах, биэнсийэлээх өттүлэрэ айан төлөбүрүгэр улаханнык оҕустарабыт. Онон Владимир Путин эрэннэрбитин курдук, 2028 сылга диэри Лена өрүһү туоруур муоста тутулуннар, Ил Дархан Айсен Николаев эппитин курдук, массыына суола аспаалланнар, онон уопсастыбаннай автобустар сылдьаллара буоллар норуокка төһөлөөх абыраллаах буолуой?- диэн биэнсийэлээх, саахымат спордун энтузиаһа Петр Николаевич эрэнэ күүтэр.
«Амма олоҕо» хаһыат.