Амма Наахара орто оскуолатыгар быйыл бэтэрээн учууталлар Матрёна Павловна Макарова, Валентина Семёновна Александрова салайбыт кылаастарын кытары нэһилиэккэ ыҥырыы таһааран Саҥа дьылы көрсө оскуолаҕа улахан бэлэх оҥордулар.
Ол туһунан ытыктыыр учууталларбыт маннык сэһэргииллэр:
—Ыҥырыыбытын ылынан оскуолабытыгар саҥа улахан Харыйа ыларга көмөлөспүккүтүгэр барҕа махталбытын тиэрдэбит. Биһиги этиибитигэр кыттыспыт 1972, 1975, 1976, 1980, 1985,1993, 2000, 2001, 2004, 2007, 2013 сыллаах выпустарбытын астынан туран бэлиэтиибит. Ону тэҥэ элбэх биирдиилээн дьон, оскуолабыт үлэһиттэрэ кыттыстылар. Ордук чорботон бэлиэтиибит 3000 солкуобай ыытан кыттыспыт Васильева (Ядрихинская) Аленаны, ытык — мааны киһибитин Матрена Михайловна Нерлованы, биһиги ыҥырыыбытын бастакынан өйөөбүт, төрөөбүт дойдутугар сүрэҕинэн ыалдьар Матвеев Алексей Николаевиһы. Барыта 80355 солкуобай хомулунна. Киирбит харчынан түөрт миэтэрэлээх харыйаны 53500 солкуобайга ыллыбыт. 26855 солкуобайга араас өҥнөөх дьэрэкээн харыйа оонньуурдарын, дьиримнии умайар гирляндалары, Тымныы оҕонньору, Хаарчаана кыыһы, уоттаах — күөстээх табалары атыыластыбыт. Оскуолаҕа ыытыллыбыт оҕолор харыйаларыгар сылдьан үөрэнээччилэр үөрүүлэрин көрөн бэйэбит тэҥҥэ үөрдүбүт. Барыгытыгар чэгиэн доруобуйаны, үлэҕитигэр ситиһиини, дьолу-соргуну, этэҥҥэ буолууну баҕарабыт. Кэлэр сыл үтүөнү, кэрэни эрэ түстээтин» — дэһэллэр.
Киһи көрөн үөрэр симэммит харыйа дьон-сэргэ болҕомтотун ылыаҕын ылла, үөрүүнү бэлэхтээн ыраахтан дьиримнии угуйда.
Ирина Корякина — Олесова.