От ыйын 21 күнүгэр СӨ култууратын үтүөлээх үлэһитэ, СӨ Бэчээтин туйгуна, Амма, Уус-Aлдан, Эбээн-Бытантай улуустарын бочуоттаах олохтооҕо Филипп Пестряков үбүлүөйдээх 75 сааһын томточчу туолбута. Дьокуускайга Уопсастыбаннай киин дьиэтигэр Филипп Петровиһы истиҥник эҕэрдэлээтилэр. Бу үтүө тэрээһиҥҥэ Амма улууһун баһылыгы социальнай боппуруостарга солбуйааччы Ньургуйаана Илларионова салайааччылаах дэлэгээссийэ сырытта уонна эҕэрдэтин тириэртэ.
“Биһиги аммалар бары ытыктыыр уонна куруутун да үөрэ-көтө көрсөр киһибит Филипп Петрович Пестряков өрөгөйдөөх үбүлүөйүнэн Общественнай киин дьиэтин саалатыгар эҕэрдэлээтибит, Амма дьонун -сэргэтин, баһылыкпыт Степан Николаевич Кузьмин аатыттан Эҕэрдэ суругу, Олоҥхо Ыһыаҕар анаан таһаарбыт кинигэлэрбит сиэрийэлэрин бэлэх ууннубут, кэргэнигэр, олоҕун аргыһа Любовь Николаевнаҕа сибэкки дьөрбөтүн бэлэх ууннубут. Амма Ытык киһитин култуура уонна норуот айымньытын салаатын начальнига Иван Иванов, Дьокуускайга баар биир дойдулаахтарбытын түмэр «Амма түмсүү» уопсастыбаннай түмсүү салайааччыта Александр Кузьмин, Амма улууһун бочуоттаах олохтооҕо Николай Шелковников эҕэрдэлээтилэр. Филипп Петрович Аммаҕа үлэлээн ааспыт кэмнэрин өрүүтүн олус үчүгэйдик саныырын, ол туһунан бары интервьюларыгар, ыстатыйаларыгар ахтарын, суруйарын бэлиэтээн туран махтанныбыт. Күн бүгүн бары тэрээһиннэрбитигэр Пестряковтар күндү ыалдьыт буолалларын, кини кэллэҕинэ ханнык баҕар тэрээһини таһымын үрдэтэрин бэлиэтээтибит. Сороҕор аммалар Филипп Петровиһы Уус- Алдан буоларын соһуйа истээччилэр. Тоҕо диэтэр уолаттара Аммаҕа төрөөбүттэрэ, Амма оскуолаларыгар үөрэммиттэрэ. Пестряковтар дьиэ кэргэн үөрэхтэрин бүтэрэн кэлэн үлэлээбит-хамсаабыт сирдэрэ Амма буолар.
Кинилэр манна 17 сыл устата таһаарыылаахтык үлэлээбиттэрэ. Онон биһиги аммалар кинини бэйэбит биир дойдулаахпытынан ааҕабыт. Бу күн Филипп Петровиһы өрөспүүбүлүкэ уопсастыбаннаһа барыта эҕэрдэлээбитэ кини дириҥ убаастабыллааҕын көрдөрөр. Элбэх истиҥ махтал тыллара этилиннилэр. Үбүлүөйдээх тэрээһинтэн бары астынан, аммалар диэн түмсэн астынныбыт”, — диэн Ньургуйаана Ивановна сырдатта.
Биһиги эрэдээксийэбит эмиэ ытыктабыллаах Филипп Петровиһы истиҥник эҕэрдэлээн туран, дириҥ махтал тылларын аныыбыт.
“Амма олоҕо” хаһыат