Амма Наахараҕа Саха сиригэр Пионерия тэриллибитэ 100 сылыгар аналлаах «Кутаа тула» бырааһынньык бэрт сэргэхтик ааста. Оскуола үөрэнээччилэрэ бу күн айылҕаҕа сылдьан, күрэхтэһэн оҕо саас умнуллубат бырааһынньыгар көхтөөхтүк кытыннылар.
Тэрээһини иитэр үлэҕэ дириэктэр солбуйааччыта Марина Макарова иилээн-салайан ыытта. Тэрээһин иннинэ кылаас салайааччылара оҕолорго айылҕаҕа сылдьан сэрэхтээх буолуу уруоктарын ыыппыттара. Оскуола үөрэнээччилэрэ икки бөлөххө арахсан, бөлөхтөр истэригэр түөртүү хамаанда тэринэн бу күн спортивнай мэһэйдэри туорааһыҥҥа күрэхтэстилэр. Манна быаны сөпкө баайыыга үс көрүҥҥэ, бастакы суһал көмөҕө, хапытааннарга сүүрэн тиийэн утуйар мөһөөччүгү сөпкө суулааһыҥҥа күрэх ыытылынна. Хамаандалар утуу-субуу бириэмэҕэ бары этаптары туораатылар. Ситиһиилээх хамаандаларга төрөппүт кэмитиэтэ, үөрэнэр оскуола кэлэктиибэ анал бириистэри туттарда.
Ийэлэргэ кылаастарынан сааскы кус үргээһинигэр оскуола төрөппүт кэмитиэтин бэрэссэдээтэлэ Альбина Александрова көҕүлээһининэн ким түргэн туттуулааҕын быһаарар күрэх ыытылынна. Манна үргээһин хаачыстыбата, ыраастык туттуу сыаналанна. Кыайыылааҕынан 3-с кылаас төрөппүтэ Людмила Александрова буолан 1000 солк сэртипикээтинэн наҕараадаланна. 2-с миэстэҕэ 11-с кылаастан элбэх оҕолоох ийэ Мария Сигаева тахсан 700 солк сэртипикээт тутта. Онтон 3-с миэстэни 6-с кылаас сатабыллаах ийэтэ Сахаяна Михайлова ылан 500 солк сэртипикээт хаһаайката буолла. Онтон бары кыттыыны ылбыт ийэлэр минньигэс сакалааттары бэлэх туттулар.
Өссө биир долгутуулаах түгэнинэн дьиэ кэргэн уонна Саха сиригэр Пионерия 100 сылыгар аналлаах пионерскай ырыаны кылааһынан толоруу күрэҕэ ыытылынна. Күрэҕи Марина Макарова пионерскай ырыа суолтатын, урукку кэм ыччатын төрөөбүт дойдуга тапталга, бэриниилээх буоларга иитэрин сиһилии кэпсии-кэпсии ыыппыта сэргэхтик көһүннэ. Кылаастар төрөппүттэрэ оҕолорун кытары тэҥҥэ таҥнан, оҥостон кэлэн кыттыбыттара тэрээһини олус киэргэттэ. Манна тэҥ көстүү, бэлэмнэнэн толоруу, сөпкө ыллааһын, кылаас кыттыыта сыаналанна. Дьүүллүүр сүбэҕэ ырыа куттаах Наталья Ефремова уонна Надежда Григорьева, айар куттаах Ирина Олесова үлэлээтилэр. Уопсай түмүккэ 8-с кылаас үөрэнээччилэрэ «Пусть всегда будет солнце!» ырыаны тэҥҥэ толорон Гран-при хаһаайыннара буоллулар. Алын сүһүөххэ элбэх үөрэнээччилээх, тылларын чопчу үөрэппит Айталина Филиппова салайар 2-с кылаастар «Весёлая звено» ырыаны толорон кыайыылааҕынан таҕыстылар. Иккис миэстэҕэ Мария Пахомова салайар 4-с кылаас «Пусть всегда буду солнце!», үһүс миэстэҕэ Сардана Александрова салайар 3-с кылаас «Пионерская дружба» ырыалары толорон таҕыстылар. Улахан бөлөхтөргө 1-кы миэстэни оскуоланы бүтэрэр Михаил Романов салайар 11 кылаас «Гимн пионеров», иккис миэстэни Анастасия Пахомова салайар 10-с кылаас «Прекрасное далёко», үһүс миэстэни Людмила Александрова салайар 7-с кылаас «Гимн пионеров» ырыалары толорон инники күөҥҥэ тахсан грамоталары , бэлэхтэри туттулар. Бу күн элбэх төрөппүт былааннаммыт бырааһынньык күн кыттыыны ылбыта оҕолорго үтүө холобур буолла.
Биир күүтүүлээх оҕо саас умнуллубат бырааһынньыга ньиргийэн, үөрүү-көтүү аргыстаах ааста.
Ирина КОРЯКИНА-ОЛЕСОВА